Արցախից ռուսական զորքերը հեռացնելը կնշանակի մաս կազմել ցեղասպանության․ Վահե Հովհաննիսյան

«Ալիևը ուզում է ռուս խաղաղապահները դուրս գան Արցախից շատ պարզ պատճառով, որ կարողանա շատ արագ և հեշտ լուծել Արացախի հարց կոչվածը։

Ալիևը շատ լավ հասկանում է, որ պատերազմից, իր հաղթանակից հետո Արցախում դեռ թեմա կա, վերջապես այնտեղ ապրում է 120 հազար մարդ, կա հայկական միավոր և կա միջազգային հանրություն, որը, ի վերջո, թույլ չի տալու նրան իրականացնել ցեղասպանություն»,-այս մասին ԼՈՒՐԵՐ.com-ի հետ զրույցում ասաց «Այլընտրանքային նախագծեր» խմբի անդամ Վահե Հովհաննիսյանը` անդրադառնալով Euronews-ին տված Ադրբեջանի նախագահի հարցազրույցին, որտեղ Ալիևը ասել էր, որ առանց ռուս խաղաղապահների «Ղարաբաղի հայերի» հետ ավելի հեշտ կլիներ շփվել․

«Այսօր մենք ունենք մի իրականություն, որը սկսել է մոտավորապես մեկ տարի առաջ՝ պաշտոնական Երևանի կոպիտ սխալների արդյունքում։ Ես չեմ պատկերացնում որևէ բանական մարդ, որ այսօր կդնի Արցախից ռուսական զորքերի հեռացման հարցը, որովհետև դա ուղղակի կնշանակի մաս կազմել ցեղասպանության, ասեմ ավելին՝ ես խորապես վստահ եմ, որ Արևմուտքում շատ լավ հասկանում են այս իրականությունը և այս պահին ոչ ոք չի դնում ռուսական խաղաղապահների հեռացման խնդիր»,- ասաց նա։

Հովհաննիսյանի խոսքով` Հայաստանի իշխանության բովանդակությունը մեկ հոգու իշխանության մեջ է և ոչ մենք, ոչ հանրությունը և ոչ նույնիսկ սեփական քաղաքական թիմը իրականում տեղյակ չեն, թե այդ մեկ հոգին ստվերում ինչ է պայմանավորվում։ Մեր զրուցակիցը ասաց, որ բանակցային նարատիվը սխալ է գնացել և նա վստահ է, որ բանակցողն էլ չի ուզում պատերազմ, բայց լուծումները իր իսկ սխալների հետևանքով շատ բարդացել են․

«Նիկոլ Փաշինյանը Ալիևին տվել է շատ մեծ սպասումներ։ Կարծում եմ, որ Հայաստանի իշխանությունը սկսել է հասկանալ իր սխալները։ Պետք է բոլորս մտածենք այս իրավիճակից դուրս գալու մասին, սա իշխանություն-ընդդիմություն հակամարտություն չէ, և բոլորս կարող ենք հայտնվել շատ ծանր վիճակում»,- ասաց նա։

Վահե Հովհաննիսյանը շեշտեց, որ բանակցությունները չպետք է ընդատվեն, և պետք է աստիճանաբար և գրագետ ձևակերպումներով բանակցային բովանդակության նարատիվում շտկումներ մտցնել։

Լիլիթ Զալիբեկյան