Իշխանությունները չեն արտահայտում հայկական շահ, այլ հակառակը, բայց ես կասկած չունեմ հայ մարդու տոկունության վրա․ Հայկ Մամիջանյան

«Այս ամենը հոգեբանական պատերազմ է և ես վստահություն ունեմ, որ իշխանությունները այս պահին որևիցե կերպ չեն արտահայտում հայկական շահ, այլ  ճիշտ հակառակը, բայց հայ մարդու տոկունության վրա կասկած չունեմ»,- ԼՈՒՐԵՐ.com-ի հետ զրույցում այս տեսակետը հայտնեց «Պատիվ ունեմ» խմբակցության պատգամավոր Հայկ Մամիջանյանը` անդրադառնալով ՀՀ ԱԳՆ խոսնակ Անի Բադալյանի այն հայտարարությանը, որ  ադրբեջանական պետական հեռուստաընկերությունը հեռարձակել է 35 րոպեանոց «ֆիլմ», որը ներկայացնում է ՀՀ ողջ սուվերեն տարածքը որպես Ադրբեջանի տարածք։

«Ես զարմանում եմ այն մարդկանց վրա, ովքեր նոր են հասկանում, թե որոնք են Թուրքիայի և Ադրբեջանի նպատակները, ինչ է նշանակում Ադրբեջանական առավելապաշտություն, ինչ է նշանակում Նիկոլ Փաշինյանի խաղաղության օրակարգը»,- ասաց նա:

Պատգամավորի խոսքով` պատերազմը չի ավարտվել և հաշվի առնելով Թուրքիայի և Ադրբեջանի վարած հռետորաբանությունը նա կարծում է, որ հերթական ռազմական ագրեսիայի հավանականությունը բարձր է մնում ցանկացած պահի։ Մեր զրուցակիցը նաև նշեց, որ այս ամենը միայն թշնամու քարոզչությամբ չի երևում, նրանց պաշտոնական հայտարարություններն էլ են դա հուշում և առհասարակ Ադրբեջանում ատելության քարոզը հայի և Հայաստանի նկատմամբ բարձր մակարդակի վրա է։

«Կարող ենք այս պահին մի շարք կետեր թվարկել, որոնք ենթադրում են Արցախի և Հայաստանի անվտանգության մակարդակի բարձրացումը  ռազմական և դիվանագիտական տեսանկյունից, բայց այդ բոլորը իմաստ չեն ունենա եթե Հայաստանը ներկայացնողները հակահայկական գործունեություն են ծավալում: Ուստի թող զարմանալի չթվա, որ ասում եմ Արցախի և Հայաստանի վերագտման ուղու համար առաջին քայլը դա Փաշինյանի անհետացումն է»,- ավարտեց Հայկ Մամիջանյանը։

Լիլիթ Զալիբեկյան