Նախկին «օրենքով գողի» տանը գողացված ապրանքներ, զենք-զինամթերք է հայտնաբերվել

SHAMSHYAN.com-ի տեղեկություններով՝ երեկ՝ օգոստոսի 6-ին, ՀՀ Ներքին գործերի նախարարության ոստիկանության քրեական ոստիկանության գլխավոր վարչության, ոստիկանության Երևան քաղաքի վարչության քրեական հետախուզության բաժնի և ոստիկանության Մաշտոցի բաժնի քրեական հետախուզության բաժանմունքի ծառայողները, համագործակցելով Հայաստանի քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնի քննիչների հետ, Երևանում հայտնաբերել են զենք-զինամթերք:

Զենքն ու զինամթերքը հայտնաբերվել է  նախկինում օրենքով գող, սակայն վերջերս գողի տիտղոսից զրկված «Աստրախանի Հայկո» մականվամբ 40-ամյա Հայկ Ղազարյանին պատկանող տանը։

Երեկ քննչական բաժինը դիմել էր Երևան քաղաքի ընդհանուր իրավասության դատարան, որպեսզի դատարանը թույլտվություն տա Հ.Ղ.-ի տանը խուզարկություն կատարվի, ինչը դատարանը բավարարել է։

Խուզարկությամբ Շահումյան 7 փողոցի 1-ին նրբանցքի տներից մեկում, որը Հ․ Ղազարյանի բնակության վայրն է, հայտնաբերվել է «Չերչիլ» տեսակի 12մմ տ/չ ողորկափող 553749 գործարանային համարի հրացան, 25 հատ 9մմ տ/չ ատրճանակի փամփուշտ, 20 հատ և 7 տուփ փակ վիճակում 7.62 տ/չ փամփուշտ, 1հատ զենքի խլացուցիչ նաև հայտնաբերվել են ավազակությամբ հափշտակված գումար, 7 հատ տարբեր տեսակի գինիներ, «Ռեդմի Նոթե12» բջջային հեռախոս, «Գուչի» գրառմամբ արևային ակնոց և հանցագործություն կատարած Հ.Ղազինյանին և Ա.Գրիգորյանին պատկանող սև բաճկոն, տաբատ, հագուստներ և սպորտային կոշիկներ, 2 դիմակ և 3 հատ ձեռնոց:

Դեպքի փաստով Աջափնյակ և Դավթաշեն վարչական շրջանների քննչական բաժնում նախաձեռնվել է քրեական վարույթ։

Աղբյուրի տեղեկություններով այն հնարավոր է միացվի օրեր առաջ Երևանի Վահագնի թաղամասում՝ «Վահագնի» ռեստորանային համալիրում, Հ․ Ղազարյանի և ևս 2 հոգու կողմից ատրճանակներով զինված ու դիմակավորված ավազակային հարձակում կատարելու փաստով նախաձեռնված քրեական գործին։

Երեկ ոստիկանները նաև հայտնաբերել են այն ավտոմեքենան, որով հանցագործները գնացել էին Վահագնի թաղամաս ավազակային հարձակում կատարելու և այդ մեքենան, որը Toyota Vellfire մակնիշի է, քննիչի որոշմամբ տեղափոխել է ոստիկանության Մաշտոցի բաժնի պահպանվող հատուկ տարածք։