Պեմզաշենի ողբերգական սպանության գործի նախաքննությունը մոտենում է ավարտին

Շիրակի մարզի Պեմզաշեն համայնքի 31-ամյա բնակչուհի Զարինե Մելիքսեթյանի, նրա 12-ամյա դստեր եւ 8-ամյա որդու սահմռկեցուցիչ սպանությունների գործի նախաքննությունը մոտենում է ավարտին: 

ԼՈՒՐԵՐ.com-ի հետ զրույցում տուժողի ներկայացուցիչ, փաստաբան Գարիկ Գալիկյանն ասաց, որ դատավարական ժամկետներ գոյություն ունեն և իր կարծիքով՝ մինչև հոկտեմբեր կավարտվի գործը․  

«Գործը դեռևս նախաքննության փուլում է։ Մի քանի փորձաքննություններ է նշանակված և նախաքննություն է ընթանում, սպասում ենք փորձագետի եզրակացություններին, կարծում եմ՝ եզրակացությունները ստանալուց հետո նախաքննության ավարտ կհայտարարվի և գործը կուղարկվի դատարան»,- ասաց Գալիկյանը և հավելեց` որպես տուժող կողմի ներկայացուցիչ իրավական առումով շատ բան իրեն հասանելի չէ այս փուլում։ 

Հիշեցնենք, որ նոյեմբերի 9-ին Պեմզաշեն գյուղի սեփական բնակարանում սպանված էին գտել 31-ամյա Զարինե Մելիքսեթյանին, նրա 12-ամյա դստերը եւ 8-ամյա որդուն: Դաժան սպանության կասկածանքով ձերբակալվել, ապա կալանավորվել են Շիրակի մարզի 32-ամյա բնակիչ Վրույր Բարսեղյանը եւ նրա ազգականը՝ 41-ամյա Արկադի Բարսեղյանը։ 

Վրույրը Բարսեղյանն ընդունել է իրեն առաջադրված մեղադրանքը՝ տալով ինքնախոստովանական ցուցմունք, իսկ Արկադի Բարսեղյանը հակառակը՝ չի ընդունում մեղադրանքը եւ նշում է, որ դեպքի վայրում չի եղել։ Երկու մեղադրյալներն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։ Նշենք, որ օգոստոսի 4-ին Արկադի Բարսեղյանը ՔԿՀ-ում հացադուլ է հայտարարել եւ պահանջում է արդար քննություն: