Եվրոպական մի շարք երկրներ միացել են Բելառուսի դեմ պատժամիջոցներին

Եվրոպական միության արտաքին քաղաքականության հարցերով բարձր ներկայացուցիչ Քեթրին Էշթոնը ողջունել է Խորվաթիայի, նախկին հարավսլավական հանրապետություն Մակեդոնիայի, Մոնտենեգրոյի, Իսլանդիայի, Սերբիայի, Ալբանիայի, Լիխտենշտեյնի և Նորվեգիայի՝ Բելառուսի դեմ պատժամիջոցներին միանալու որոշումը։ «ԵՄ-ն ի գիտություն է ընդունում այս երկրների որոշումը», - նշվում է Էշթոնի հայտարարության մեջ, փոխանցում է РИА Новости-ն։

ԵՄ 27 երկրների արտաքին գերատեսչությունների ղեկավարները հոկտեմբերի 27-ին Լյուքսենբուրգում կայացած նիստին որոշում են կայացրել Բելառուսի իշխանությունների նկատմամբ պատժամիջոցները հետաձգել մինչև 2013 թվականի հոկտեմբերի 31-ը ՝ կապված երկրում մարդու իրավունքների իրավիճակի բարելավման, օրինականության և ժողովրդավարության սկզբունքների բացակայության հետ։

ԵՄ երկրների ԱԳՆ ղեկավարները կոչ են արել Բալառուսին ազատ արձակել և վերականգնել առանց բացառության բոլոր քաղբանտարկյալներին։ Ընդ որում, Բելառուսի իշխանություններին կոչ է արվել հրաժարվել քաղաքացիական հասարակության, ընդդիմության և ԶԼՄ-ների ներկայացուցիչների ահաբեկման և հետապնդման պրակտիկայից։

Միևնույն ժամանակ Եվրոպական միության արտաքին քաղաքականության հարցերով խորհուրդը հայտարարել է Բելառուսում քաղաքացիներին և քաղաքացիական հասարակությանը ցուցաբերվող աջակցության ուժեղացման, ինչպես նաև վերահաստատել է պատրաստակամությունը՝ սկսել բանակցությունները վիզաների տրամադրման մասին Բելառուսի հետ համաձայնությունների կնքման վերաբերյալ։ ԵՄ երկրների արտգործնախարարները նաև կոչ են արել պաշտոնական Մինսկին հետևել Բելառուսում ԵՄ երկրների դիվանագիտական առաքելությունների անձեռնմխելիությանն և արտոնություններին, ինչպես նաև չխոչընդոտել նրանց պրոֆեսիոնալ գործունեությունը։