Դոն Պիպոյի հանցակցելու եւ զենքի գործադրմամբ խուլիգանություն կատարելու գործով եւս 3 անձի նախաքննությունն ավարտվել է

Իրավունք 21 Օգոստոս, 2023 17:50

Ավարտվել է զենքի գործադրմամբ խուլիգանության եւ հանցավոր կազմակերպությանը մասնակցելու դեպքի առթիվ նախաձեռնված քրեական վարույթից եւս երեք անձի վերաբերյալ նախաքննությունը:

Քննչական կոմիտեից հայտնում են, որ նախաքննության ընթացքում իրականացված քննչական եւ վարութային մեծածավալ գործողությունների արդյունքում պարզվել եւ հիմնավորվել է, որ Արմավիրի մարզի Վաղարշապատ քաղաքի բնակիչ, «Դոն Պիպո» մականվամբ հայտնի Ա.Ա.-ն, հակառակորդ համարվող անձանց հրապարակայնորեն պատժելու եւ նրանցից վրեժխնդիր լինելու մոլուցքով դրդված, մարտի 14-ին կազմակերպության անդամներին հանձնարարել է հավաքվել Վաղարշապատ քաղաքի Նալբանդյան փողոցում գտնվող ռեստորանային համալիրում, որտեղ վերջիններս, զինված ապօրինի կերպով ձեռք բերած հրազեններով եւ ռազմամթերքով, սպասել են հակառակորդ խմբավորման անդամների եւ նրանց համախոհների ժամանելուն:

Նույն օրը՝ ժամը 21:00-ի սահմաններում, վերջիններս, ապօրինի կերպով ձեռք բերած զենքերով զինված, ժամանել են հիշյալ համալիր: Վերը նշված երկու խմբավորումների կազմում ընդգրկված անձինք, իրենց անձի եւ խմբավորման առավելություններն ընդգծելու մոլուցքով տարված, դիտավորությամբ կոպիտ կերպով խախտել են հասարակական կարգը, 2-3 րոպե տեւողությամբ խաթարել են Էջմիածին քաղաքի Նալբանդյան փողոցի երթեւեկությունը, աղմկել են, հայհոյել եւ փոխադարձ կռվի են բռնվել միմյանց հետ, որի ընթացքում տարբեր հրազեններից փոխադարձ կրակոցներ են արձակել միմյանց ուղղությամբ: Այդ ընթացքում հանցավոր կազմակերպության անդամ, մարզիկ Գ.Ա.-ն, բռնություն գործադրելով հակառակորդ խմբավորման մասնակիցների նկատմամբ, հարվածներ է հասցրել նրանց, ապա՝ նախապես վերցրած՝ ապօրինի կերպով ձեռք բերած հրազենից կրակոցներ է արձակել ու նույն զենքի բռնակով հարվածել նրանցից մեկի գլխին:

Հիշյալ խուլիգանության, ինչպես նաեւ 2021թ. մայիսին հանցավոր համագործակցության մասնակիցներից մեկի եւ Ա.Ա.-ի եղբոր սպանության դեպքերից հետո, Ա.Ա.-ն եւ վերջինիս կնոջ բարեկամ Կ.Ղ.-ն մեկնել են ՀՀ-ից, որից հետո հանցավոր համագործակցության մասնակից Ա.Հ.-ն ստանձնել է հիշյալ կազմակերպության ղեկավարի դերակատարությունը: Վերջինս, հակառակորդ խմբավորման անդամների նկատմամբ հաշվեհարդար տեսնելու՝ նրանց սպանելու նպատակով, Արմավիրի մարզի բնակիչներ Հ.Ի.-ին, Դ.Բ.-ին եւ այլ անձանց, պատվիրել է խոշոր գումարի դիմաց սպանել վերը նշված անձանց: Ընդունելով առաջարկը՝ Դ.Բ.-ն եւ Հ. Ի.-ն ընդգրկվել եւ մասնակցել են վերը նշված հանցավոր համագործակցությանը, հիշյալ սպանություններն իրականացնելու նպատակով, Ա.Հ.-ի ղեկավարմամբ, սկսել են մարտարվեստի հնարքներ սովորել, սակայն շուրջ երկու շաբաթ մարզումների մասնակցելուց հետո վերջիններս հրաժարվել են իրագործել նախկինում ստանձնած սպանությունների կատարումը, որի արդյունքում վերոհիշյալ հանցագործություններն ավարտին չեն հասցվել:

Արմավիրի մարզի հիշյալ բնակիչներին հսկողության տակ եւ իրենց տեսադաշտում պահելու նպատակով Ա.Հ.-ն ներգրավել է նրանց հանցավոր համագործակցության կողմից ապօրինի կերպով ձեռք բերված եւ պահված զենքերի ու ռազմամթերքի տեղից-տեղ փոխադրելու, պահելու գործընթացի մեջ: Հանցավոր կազմակերպության անդամները ապօրինի կերպով ձեռք են բերել, կրել, փոխադրել եւ տարբեր վայրերում պահել տարբեր տեսակի զենք եւ ռազմամթերք, որոնք նախաքննության ընթացքում կատարված խուզարկությունների արդյունքում հայտնաբերվել են:

Ձեռք բերված բավարար փաստերի հիման վրա հանցավոր կազմակերպության անդամ Գ.Ա.ին մեղադրանք է ներկայացվել՝ ՀՀ քրեական օրենսգրքի 297-րդ հոդվածի 3-րդ մասով եւ 335-րդ հոդվածի 3-րդ մասով, Դ.Բ-ին եւ Հ.Ի.-ին՝ ՀՀ քրեական օրենսգրքի 335-րդ հոդվածի 3-րդ մասով:

Հիշյալ երեք մեղադրյալների վերաբերյալ նախաքննությունն ավարտվել է, քրեական վարույթի նյութերն ուղարկվել են հսկող դատախազին՝ մեղադրական եզրակացությունը հաստատելու եւ դատարան ուղարկելու համար: