Այս տարվա արդյունաբերական ծավալները 11.6%-ով ավելի են նախորդից

2012թ.-ի հունվար-սեպտեմբեր ամիսների արդյունաբերական ցուցանիշները կազմել են 796,430.4 մլն ՀՀ դրամ, որը նախորդ տարվա նույն ժամանակահատվածի ցուցանիշները գերազանցել է 11.6%-ով: Մասնավորապես, այս տարվա սեպտեմբերին արդյունաբերական արտադրանքի ծավալները կազմել են 94,322.0 մլն ՀՀ դրամ` նախորդ տարվա նույն ամսվա տվյալները գերազանցելով 0.3%-ով:

Այս տարվա հունվար-սեպտեմբեր ամիսներին արդյունաբերական արտադրանքի մեջ գերակշիռ մասն ապահովվել է մշակող արդյունաբերության շնորհիվ (61.8%), որի մեջ 36.4%-ը պատկանում է սննդամթերքի արտադրությանը:

Էլեկտրաէներգիայի, գազի, գոլորշու և լավորակ օդի մատակարարում խմբի արտադրությանը բաժին է ընկնում ընդհանուր արդյունաբերական արտադրանքի 18.5%-ը, հանքագործական արդյունաբերություն և բացահանքերի շահագործում խմբին` 18%-ը և ջրամատակարարում, կոյուղի, թափոնների կառավարում և վերամշակում խմբին` 1.5%-ը:

Թողարկված արտադրանքի ծավալների զգալի մասն արտադրվել է Երևան քաղաքում (42%), 18.8%-ը` Սյունիքի մարզում, իսկ Կոտայքի մարզում` 11.7%-ը: