Ապարանում թալանել են տեղի հայտնի առևտրականներից մեկի տունը․ տարել են նաև «Սայգա» տեսակի հրացան

SHAMSHYAN.com-ի տեղեկություններով օգոստոսի 18-ին առանձնապես խոշոր չափի գողության դեպք է տեղի ունեցել Արագածոտնի մարզում։

Այդ օրը՝ ժամը 22:20-ի սահմաններում, ՀՀ Ներքին գործերի նախարարության Ոստիկանության Ապարանի բաժին ահազանգ է ստացվել Ապարան քաղաքի 19-ամյա բնակչից, ով հայտնել է, որ տնից գողություն են կատարել։

Աղբյուրի հաղորդմամբ՝ տեղում ահազանգող Մարինա Թ․-ն ոստիկաններին և քննիչներին հայտնել է, որ նույն օրը 19:30-ից մինչև 22:00 ընկած ժամանակահատվածում անհայտ անձը կամ անձինք, Հ․ Հովակիմյան փողոցի իրենց տան հյուրասենյակի եվրոպատուհանը բաց լինելու հանգամանքից օգտվելով, մտել են ներս և ննջասենյակից գողացել մետաղյա պահարանը։

Աղբյուրի տեղեկություններով՝ նա հայտնել է, որ այնտեղ եղել է 1 մլն 200 հազար դրամ գումար, մոտ 3 մլն դրամ արժողությամբ ոսկյա զարդեր, ինչպես նաև իր 50-ամյա հորը՝ Հրաչյա Թ․-ին պատկանող «Սայգա 12» տեսակի որսորդական հրացանը։

Դեպքի փաստով Հայաստանի քննչական կոմիտեի Արագածոտնի մարզային քննչական վարչությունում նախաձեռնվել է քրեական վարույթ։

Աղբյուրի տեղեկություններով՝ տան տերը, որտեղից կատարվել է խոշոր չափի գողություն, Ապարանում հայտնի առևտրական  է։

Ոստիկանությունն ու քննչական բաժինը ձեռնարկում են անհրաժեշտ միջոցառումներ՝ գողությունը կատարած անձի կամ անձանց ինքնությունը պարզելու, նրանց և գողոնը հայտնաբերելու ուղղությամբ։