Թրամփը ժամանել է Ջորջիա ձերբակալման ընթացակարգ անցնելու համար

ԱՄՆ նախկին նախագահ Դոնալդ Թրամփը ժամանել է Ջորջիայի Ֆուլթոն շրջանի բանտ՝ հանձնվելու իշխանություններին և սկսելու ընտրություններին միջամտելու համար կալանավորվելու պաշտոնական գործընթացը, հայտնում է CNN-ը։

Թրամփի 10 մեքենաներից բաղկացած ավտոշարասյունը շարժվել է դեպի բանտի շենք տեղական ժամանակով մոտավորապես 19:34-ին (Երևանի ժամանակով՝ 05:34-ին), Ատլանտայի օդանավակայանում նրա ինքնաթիռի վայրէջքից կես ժամ անց: Բանտում նրան պետք է խուզարկեին, նկարեին ու մատնահետք վերցնեին։ Ավելի վաղ ամերիկացի նախկին առաջնորդի ներկայացուցիչները պայմանավորվել eն Թրամփին 200 հազար դոլար գրավի դիմաց ազատ արձակել։

Ավելի ուշ CNN-ը հայտնել է, որ Թրամփը լքել է բանտը։ Նա ՔԿՀ-ում մնացել է մոտ 20 րոպե։ Նրա ավտոշարասյունը շարժվել է դեպի Ատլանտայի օդանավակայան։ Նախկին նախագահը հանձնվել է իշխանություններին դատախազության կողմից սահմանված ժամկետի լրանալուց մեկ օր առաջ՝ օգոստոսի 25-ի կեսօրին։

Թրամփը բանտի գրառումներում մուտքագրվել է P01135809 համարով, կայքում հայտնվել է նրա տվյալներով գրառումը։ Հրապարակված տեղեկությունների համաձայն՝ քաղաքական գործչի հասակը մոտ 190 սմ է, քաշը՝ մոտ 97,5 կգ։ Թրամփն արդեն չորրորդ անգամն է, որ պետք է անցնի կալանքի ընթացակարգը, սակայն նախորդ դեպքերում ամերիկացի նախկին առաջնորդը գրավ վճարելու կարիք չի ունեցել, և դատարանը արգելք չի սահմանել, որը կսահմանափակի նրա՝ սոցիալական հարթակների օգտագործումը։