The Washington Post. Կիևում պահանջում են նոր ընտրություններ անցկացնել

Հարյուրավոր ուկրաինացիներ երկուշաբթի բողոքարկել են անցյալ ամիս անցկացված ընտրությունների արդյունքները՝ դրանք հայտարարելով կեղծ։ Ընդդիմությունը սպառնացել է բոյկոտել նոր խորհրդարանը ու կոչ է արել անցկացնել նոր ընտրություններ, գրում է The Washington Post-ը:

Արևմտյան դիտորդները համարել են հոկտեմբերի 28-ին կայացած ընտրությունները անարդար՝ նշելով, որ Վիկտոր Յանուկովիչի գլխավոր հակառակորդի՝ Յուլյա Տիմոշենկոյի բանտարկումը և ոչ թափանցիկ քվեարկության անցկացումը ժողովրդավարության հարցում հետքայլ էին:

3 արևմտամետ ընդդիմադիր կուսակցությունները լավ արդյունքներ են ցույց տվել համամասնական ցուցակներով՝ ձեռք բերելով խորհրդարանի 450 մանդատների կեսը։ Սակայն, նրանք մեղադրում են իշխանություններին արդյունքները կեղծելու մեջ՝ Յանուկովիչի դաշնակիցների համար մեծամասնություն ապահովելու նպատակով:

Տիմոշենկոյի «Հայրենիք» կուսակցության առաջնորդ Արսենի Յացենյուկը Կիևում գտնվող ԿԸՀ գրասենյակի դիմաց հավաքված մոտ 2000-անոց ամբոխին ասել է, որ ընդդիմությունը պահանջում է կատարել ձայների վերահաշվարկ վիճելի շրջաններում: Մինչ այդ նույն կուսակցությունը սպառնացել էր նոր խորհրդարանը հայտարարել անօրինական:

Հիշեցնենք, որ ԵՄ դիվանագիտության ղեկավար Քեթրին Էշթոնը և ԵՄ ընդլայնման և եվրոպական քաղաքականության հարցերով հանձնակատար Շտեֆան Ֆյուլեն շաբաթ օրն իրենց անհանգստությունն էին արտահայտել այն կապակցությամբ, որ ընտրությունների անցկացումից հինգ օր անց դեռևս չեն հրապարակվել դրանց արդյունքները: Այդ առիթով նրանք կոչ են արել ուկրաինական իշխանություններին և բոլոր շահագրգիռ կողմերին ձեռնարկել բոլոր անհրաժեշտ միջոցներն ընտրությունների արդյունքների շուտափույթ հրապարակման համար: