«Ուրիշներին կրակելու կոչ ես անում ու փախչում քաղաքական դուելից, այ վախկոտ դասալիք». Փաշինյան

«Ասեք, կանենք» կարգախոսով մենք երկու բան ենք ընդգծում: Այս մասին այսօր՝ սեպտեմբերի 15-ին, Երեւանի քաղաքապետարանի դիմաց ՔՊ-ի հանրահավաքի ժամանակ իր ելույթում նշեց ՀՀ վարչապետ Նիկոլ Փաշինյանը:

«Առաջինն  այն է, որ Երեւան քաղաքում ասողը Երեւանի ընտրողն է, ուրիշ ասող չկա, չի եղել ու չի լինելու: Երկրորդը, համայնքի ոգու ամենակարեւոր առանձնահատկությունը երկխոսությունն է, մասնակցայնությունը: Մենք ուզում ենք, որ երեւանցին մասնակցի Երեւանի նոր ծաղկունքին, նոր վերածննդին, նոր վերելքին, դրա համար ենք ասում՝ ասեք, կանենք»,-ասաց Փաշինյանը:

Նա անդրադարձավ հանրային հեռուստատեսությամբ քաղաքապետի թեկնածուների բանավեճին՝ շնորհակալություն հայտնելով Տիգրան Ավինյանին. «Նա նոր տեմպ, նոր արագություն է տվել Երեւան համայնքում մեր 2018-ի նախընտրական ծրագրի իրականացմանը:

Ուզում եմ իմ տարակուսանքը հայտնել այն մարդկանց նկատմամբ, որոնք արհամարհեցին բանավեճըի հարթակը: Բեմում միայնակ կանգնել, վարչապետի ձայնը նմանակելով խոսել... դա վատ չէ, դա հեղափոխության արժեք է, ազատություն է, որ այո, բոլոր հրապարակները, բոլոր բեմերը ազատ են ՀՀ ամեն մի քաղաքացու համար: Բայց հեղափոխության արժեք է նաեւ քաղաքական բանավեճը: Ես երկու անգամ մասնակցել եմ բանավեճերի որպես վարչապետ, որովհետեւ բանավեճը հարգանք է ընտրողի համար, իսկ հրաժարվելը արհամարհանք ու քամահրանք է ընտրողի նկատմամբ: Բա մեղադրանքներ էիք հնչեցնում, բա գնայիր, նայեիր ՔՊ-ի ներկայացուցչի աչքերի մեջ ու շպպացնեիր ասելիքդ: Դուք աչքերի մեջ նայել չգիտեք, որովհետեւ  չեք կարող, որովհետեւ բարոյական փախստականները չեն կարողանում նայել ուրիշների աչքերի մեջ: Բա ինչո՞ւ չեք գնում բանավեճի, որովհետեւ վախենում եք, որ կարող է պարզվի, որ էլի ոչ թե ձեր, այլ ուրիշի ձայնով եք խոսում: Կարող է պարզվել, որ ուրիշի սցենարով եք խաղում, եւ դա է պարզվել»,-հայտարարեց վարչապետը: