«Հրապարակ». Ծառուկյանը կրակն է ընկել երեք նախագահների միջև

«Հրապարակ»-ը խմբագրականում գրում է. «Ինչքան ավելի սրտատրոփ են ոմանք սպասում ԲՀԿ որոշմանը ՀՀ նախագահի ընտրություններին մասնակցել-չմասնակցելու առումով, այնքան ավելի շատ է նազ ծախում ԲՀԿ-ն: Եթե չի մասնակցելու ընտրություններին, այլ պաշտպանելու է գործող նախագահի թեկնածությունը, այս հապաղումը կարող է բարձրացնել իր «ակցիաները» և քաղաքական առևտրի մեջ հաջողության, իսկ հետընտրական փուլում ավելի ծանրակշիռ «արդյունքի» հանգեցնել: Եթե չի պաշտպանելու և հանդես է գալու սեփական թեկնածուով, ապա սրանով հետաձգում է «հատուցման» ժամը և ժամանակ շահում: Հնարավոր է նաև երրորդ տարբերակ`«ոչ սատարել, ոչ առաջադրել» սկզբունքով: Որն առաջին հայացքից չարյաց փոքրագույնն է սակայն չսատարել ու միաժամանակ չառաջադրվել՝ նշանակում է ոչինչ չշահել, բայց շատ բան կորցնել:

Երեկ մի քաղաքագետ հետաքրքիր արտահայտության արեց. «Ծառուկյանը կրակն է ընկել երեք նախագահների միջև»`ոչ մի կերպ չգիտի որ կողմ գնալ: Սա այն դեպքն է, որ աջ գնաս' ջուր է, ձախ գնաս' կրակ, իսկ ուղիղ գնալն էլ անդունդն ընկնել է նշանակում: Որ ուղղությամբ է գնալու ԲՀԿ առաջնորդը, որ անկորուստ դուրս գա այս պատմությունիցլ Եվ դա այնպես անի, որ սեփական թիմը նույնպես գոհ մնա: Որ ոչ իր հեղինակությունը տուժի, ոչ հարստությունը նվազի: Որ այս ընտրություններով քաղաքական կարիերան ու տնտեսական գործունեությունն անփառունակ վախճան չունենան: Եվ վառոդամանում մի քիչ էլ վառոդ մնա առաջիկա ճակատամարտերի համար: Մի խոսքով' բարդ ընտրության առաջ է կանգնած ԲՀԿ առաջնորդը: Ամեն դեպքում, այս երկակի վիճակն ու լարախաղացի տվայտանքները չեն կարող երկար շարունակվել: Վաղ թե ուշ ԲՀԿ-ն պետք է կողմնորոշվի և հայտարարի այդ մասին: Դրանից հետո կգա մյուսների «կողմնորոշվելու» պահը»: