Ընտրության գործընթացը կազինո կամ Vivaro այցելել չէ

Քաղաքական փորձագետ Տիգրան Աբրահամյանը facebook սոցցանցի իր էջում գրել է.

«Հայաստանի քաղաքական դաշտում որոշակի ազդեցություն ունեցող այն քաղաքական ուժերը, որոնք դեռևս չեն հայտարարել, թե նախագահական ընտրություններին ինչ ֆորմատով են մասնակցություն ունենալու, նույնիսկ իրենց թույլ են տալիս սարկազմով խոսել այն ուժերի մասին, ովքեր կոնկրետություն են մտցրել այս հարցում: Իրենց որոշման մասին հայտարարություն չանողներն ու չկողմոնորոշվածները դա համարում են լոկ մարտավարական քայլ (չնայած նրանց անկեղծությանը քչերն են հավատում): Սակայն նրանք բավականին հաճախ մոռանում են մեկ այլ՝ ավելի կարևոր հանգամանքի մասին: Ընտրության գործընթացը կազինո կամ Vivaro այցելել չէ, որ «խաղից» առաջ երբ էլ մտնես հնարավոր կլինի խաղադրույք կատարել, քաղաքական ուժերը հաճախ մոռանում են, որ բուն քվեարկությունից բացի կա նախընտրական փուլ հասկացությունը, որի ժամանակ այդ ուժերը պարտավոր են ներկայացնել իրենց ծրագրերն ու երկրի առջև կանգնած մարտահրավերների լուծման իրենց տարբերակները: Եթե բարեփոխումների ու դեմոկրատիայի կեղծ թիկնոցով շրջող այս ուժերը շարունակեն առաջնորդվել նման մարտավարությամբ, ապա փետրվար ամիսը նրանց «սառը ցնցուղ» է խոստանում»: