Հայ դատի գրասենյակը կոչ է արել Ադրբեջանում ԱՄՆ-ի դեսպանին այցելել Ջուլֆայի հայկական գերեզմանոց

ԱՄՆ-ում հայ դատի գրասենյակը կոչ է արել Ադրբեջանում ԱՄՆ-ի դեսպան Ռիչարդ Մորնինգսթարին ի կատար ածել տրված խոստումը և այցելել Ջուլֆայի հայկական գերեզմանոց, որտեղ, ըստ հրապարակված նյութի, հազարավոր խաչքարեր են ավիրվել։

Ինչպես հայտնի է, մեկնաբանելով իր՝ վերջերս կատարած այցը Նախիջևան, դեսպանը ափսոսանք է հայտնել առ այն, որ Ադրբեջանի պաշտոնական անձինք իբր անվտանգության նկատառումներով անհնար են համարել դեսպանի այցելությունը գերեզմանոց. «Տարածաշրջանի ժառանգության պաշտպանությունը կարևոր է ապագա խաղաղության համար։ Ղարաբաղյան հակամարտության արդյունքում տարածաշրջանում արդեն վնաս է հասցվել և վերացվել հուշարձանների մեծ քանակություն»։

Հայ Դատի հայտարարության մեջ մասնավորապես ասվում է. «Դեսպան Մորնինգսթարը կարող է կա՛մ թակել նախագահ Ալիևի դուռը, մինչև հանվի անհիմն արգելքը, կա՛մ էլ ինքնուրույն այցելել Ջուլֆայի գերեզմանոցը։ Ամեն դեպքում պարզ է, որ ինչպես ամերիկացիները, մենք չպետք է վաճառենք Ադրբեջանին զինամթերք գերեզմանոցների վերացման համար, կամ էլ օգնություն ուղարկենք Բաքվի կառավարությանն այն դեպքում, երբ նա խաղաղ պայմաններում արգելում է դեսպանի մուտքը մշակութային վանդալիզմ իրականացված վայր»։

Այս կապակցությամբ նաև հիշեցվում է, որ մինչև Մորնինգսթարի նշանակումը, պատասխանելով ամերիկացի սենատորներ Ռոբերտ Մենեդեսի և Բարբարա Բոքսերի հարցերին, նշել է, որ ջանքեր չի խնայի հայկական գերեզմանոց այցելելու համար և համարում է նման վանդալիզմն անընդունելի։

«Իր վերջին հայտարարության մեջ Ջուլֆայի գերեզմանոցի հետ կապված՝ դեպսան Մորնինգսթարը խոսել է Ադրբեջանի «բազմազան մշակութային ժառանգության» մասին, մատնացույց արել Ալիևի հակահայկական քաղաքականությունը, այդ թվում՝ նաև սահմանին իրականացվող հարձակումները և Ռամիլ Սաֆարովի ներումը, որը Հունգարիայում ՆԱՏՕ-ի ծրագրի ընթացքում կացնով սպանել էր հայ սպաի»,-նշվում է հայտարարության մեջ, փոխանցում է ИА REGNUM-ը։