Հայաստանի վրա լույսը պետք է բացվի թիվ 1 ընտրատարածքից. Րաֆֆի Հովհաննիսյան (տեսանյութ)

Այսօր մեկնարկեց թիվ 1 ընտրատարածքում  դեկտեմբերի 2-ին կայանալիք Ազգային ժողովի մեծամասնական ընտրակարգով պատգամավորի թեկնածու, «Ժառանգության» վարչության քարտուղար Ստյոպա Սաֆարյանի նախընտրական քարոզարշավը։

Քարոզարշավի մեկնարկին ներկա էր «Ժառանգություն» կուսակցության առաջնորդ Րաֆֆի Հովհաննիսյանը, ով իր ելույթով կոչ արեց բնակիչներին իրենց ձայնը տալ Ստյոպա Սաֆարյանին։

«Ստյոպա Սաֆարյանն ունի լույս, ունի սեր, թրծված վերլուծաբան, ժողովրդի իրավունքների պաշտպան։ Եթե լույսը պիտի բացվի Հայաստանի վրա, պետք է բացվի թիվ մեկ ընտրատարածքից, սակայն դա հեշտ չի տրվում մեր երկրում»,-իր ելույթում նշեց Րաֆֆի Հովհաննիսյանը։

«Ես լիովին վստահում եմ Ստյոպա Սաֆարյանին։ Իմ ջանքերն ինչքան ներում են, ամեն ինչ անելու եմ, որ լինի պատգամավոր, որովհետև իր ներկայությունը խորհրդարանում շատ կարևոր է. ինքն իր ունակուկություններով, գիտելիքներով անհրաժեշտություն է խորհրդարանում»,-Lurer.com-ի հետ զրույցում ասաց Անահիտ Բախշյանը։

«Չկա ավելի մեծ ու առաջնային շահ, քան ժողովրդի, պետության ու քաղաքացու շահը։ Չկա ավելի մեծ իշխանություն, քան ժողովրդի իշխանությունն է։ Պատգամավորն այդ իշխանության իրականացման միջոցն է, և ոչ թե կրողն ու վայելողը, այդ բոլոր հարթակներում ժողովրդի, բայց ոչ իր ընտանիքի կամ շրջապատի շահերի ներկայացուցիրչը»։ Այսպիսի ուղերձ է հղում Ստյոպա Սաֆարյանը թիվ 1 ընտրատարածքի բնակիչներին։

Քարոզարշավի մեկնարկին ելույթներով հանդես եկան կուսակցության մյուս անդամները ևս, ովքեր իրենց աջակցությունը և բարի մաղթանքները հղեցին Ստյոպա Սաֆարյանին։

Պատգամավորի թեկնածուի կարգախոսն է՝ «Միասին փոխենք մեր կյանքը»։