Ինչու է Ալեքսանդր Ազումանյանն այցելել Նաիրի Հունանյանին. Պարզաբանում է պատգամավորը

ՀՀ Աժ «Ժառանգություն» խմբակցության պատգամավոր Ալեքսանդր Արզումանյանն անդրադարձել է facebook սոցցանցի օգտատերերի կողմից բարձրացված այն հարցին, թե ինչու են պատգամավորները հոկտեմբերի 26-ին այցելել Հունանյանին և հարցն ուղղել հատկապես Ալիկ Արզումանյանին, թե ինչու են գաղտնի պահում իրենց այցը.

«Հայաստանի Հանրապետությունը վավերացրել է ՄԱԿ-ի Գլխավոր Վեհաժողովի կողմից ընդունված «Խոշտանգումների եւ այլ դաժան, անմարդկային եւ արժանապտվությունը նսեմացնող վերաբերմունքի կամ պատժի դեմ» կոնվենցիան, ինչպես նաեւ այդ կոնվենցիայի կամընտիր արձանագրությանը եւ, ըստ այդմ ստանձնել է մի շարք միջազգային պարտավորություներ: Ժնեւում գործող ՄԱԿ-ի՝ Խոշտանգումների դեմ Կոմիտեն իր նստաշրջաններում պարբերաբար լսում է տարբեր երկրների, այդ թվում նաեւ Հայաստանի՝ կոնվենցիայի պահանջների կատարման մասին զեկույցները: Կոմիտեն տալիս է գնահատականներ, ինչպես նաեւ կոնկրետ հանձնարարություններ առկա թերությունները վերացնելու վերաբերյալ: Վերջին զեկույցում Կոմիտեն մի շարք մտահոգություններ է հայտնել կապված ՔԿՀ-ների գերբնակեցման, ցմահ կալանավորվածների պահման պայմանների, բժշկական եւ հոգեբանական օգնության, կոնկրետ խցերում սանիտարական պայմանների, կարճաժամկետ եւ երկարաժամկետ այցելությունների եւ էլի մի շարք հարցերի վերաբերյալ:

ԱԺ Եվրաինտեգրման եւ Մարդու Իրավունքների Պաշտպանության հանձնաժողովները, որպես այդ խնդիրներով անմիջապես զբաղվող մարմիններ ս.թ. նոյեմբերի 20-ին այդ թեմայով լսումներ է անց կացնելու ԱԺ-ում: Ակնհայտ է, որ լսումներից առաջ անհրաժեշտ էր այցելել ՔԿՀ-ները եւ ուսումնասիրել, թե որքանով են կատարվում Կոմիտեի հանձնարականները:

Պատգամավորների մի խումբ առայսօր այցելել է Նուբարաշեն (երկու անգամ), Էրեբունի, Կենտրոն ՔԿՀ-ները: Հիմնականում այցելել ենք ցմահ կալանավորներին, ինչպես նաեւ այն կալանավորներին, որոնց վերաբերյալ ստացել ենք կոնկրետ բողոքներ, կամ որոնց գործերն ունեն հասարակական հնչեղություն: Միշտ տեղում է որոշվել, թե կոնկրետ, որ խուցը պետք է այցելվի, որպեսզի պահպանվի անակնկալության էֆեկտը:

Այցելվել է կալանավորների մի շատ խայտաբղետ խումբ՝ նաիրի հունանյանից մինչեւ ՀԱԿ անդամ քաղկալանավոր Տիգրան Առաքելյանը:
Ի միջի այլոց, նշեմ, որ Կենտրոն ՔԿՀ թիվ 18 խցի սանիտարահիգիենիկ վիճակին հատուկ անդրադարձ կա վերոհիշյալ Կոմիտեի զեկույցում, ավելին՝ ասեմ ձեզ, որ 2007թ. ես անձանբ 6 ամիս անց եմ կացրել թիվ 18 խցում եւ ունեցել եմ անձնական ցանկություն այցելել նաեւ այդ խուցը, ինչի մասին տեղեկացրել եմ ՔԿՀ-ի ղեկավարությանը: Ավելի ուշ պարզվել է, որ հենց այդ խցում է գտնվում հունանյանը:

Հ.Գ. Այս ողջ գործընթացը եղել է բացարձակապես թափանցիկ, որեւէ փաստ չի թաքցվել, լսկ լրատվամիջոցներն էլ այն լուսաբանել են առաջին օրվանից»: