Stuttgarter Zeitung. Նոր մանրամասներ Թուրքիայի վարչապետի Գերմանիա կատարած այցից

Վերջին լուրեր 6 Նոյեմբեր, 2012 16:18

Այն, որ ս.թ հոկտեմբերի վերջին Թուրքիայի նախագահը պաշտոնական այց էր կատարել Գերմանիա, թերևս լուսաբանվել է զանգվածային բոլոր լրատվամիջոցներով, որում հիմնականում ներառվել էր Գերմանիա-Թուրքիա միջպետական հարաբերությունների նոր մեկնարկի վերաբերյալ առկա տեղեկատվությունը: Սակայն, քիչ ուշադրություն է հատկացվել հանդիպման այն մանրամասներից, որում Թուրքիայի նախագահը պարզապես ՎԵՐՋՆԱԺԱՄԿԵՏՆԵՐՈՎ է արտահայտվել Գերմանիայի կանցլերի հետ հանդիպման ընթացքում, որի վերաբերյալ գերմանական Stuttgarter Zeitung-ը որոշ մանրամասներ է հաղորդել: Ըստ պարբերականի՝ Թուրքիայի վարչապետն իր խոսքում առաջին անգամ պաշտոնական Անկարայի եւ եվրոպական կառույցների հարաբերությունների ողջ պատմության ընթացքում մատնանշել է անդամակցության բանակցությունների հնարավոր վերջնաժամկետների մասին, ըստ որի եթե մինչև 2023 թվականը Թուրքիայի՝ Եվրամիությանն անդամակցելու հարցը չլուծվի, ապա Եվրոպան կկորցնի Թուրքիային:

Հարկ է նշել, որ Թուրքիայի հետ ԵՄ անդամակցության բանակցությունները պաշտոնապես մեկնարկել են 2005 թվականի աշնանը, սակայն որոշ ժամանակ անց սառեցվել են: Հիմնական պատճառը Կիպրոսի շուրջ Թուրքիայի որդեգրած անհաշտ մոտեցումն էր, երբ Թուրքիան սկզբում համաձայնեց բացել իր նավահանգիստներն ու օդանավակայանները կիպրոսյան տրանսպորտային ընկերությունների համար, իսկ հետագայում հրաժարվեց կատարել իր իսկ ստանձնած պարտավորությունը:

«Մենք ճանաչում ենք Հյուսիսային Կիպրոսը՝ որպես անկախ պետություն: Ուրիշները կարող են դա չանել, սակայն տիկին Մերկելը նախկինում էլ ասել է, որ Հարավային Կիպրոսը Եվրամիության կազմում ընդգրկելը սխալ էր, եւ այդ թերի կացությունը այսօր էլ պահպանվում է: Պետք է հասկանալ, որ Թուրքիան Եվրամիության հետ շուրջ 50 տարի շարունակվող այս գործընթացում ի վերջո հստակ արդյունքի պետք է հասնի: Նման վերաբերմունք ցուցաբերվել է միայն մեր երկրի հանդեպ։ Ի վերջո, մեզ անհրաժեշտ է հաղթահարել այս ամենը»,-Բեռլինում կայացած համատեղ մամուլի ասուլիսի ժամանակ հայտարարում էր թուրքական կառավարության ղեկավարը:

Սակայն վերոնշյալ պարբերականի հաղորդմամբ՝ գերմանական կողմը, այնուամենայնիվ, որևէ հստակ խոստում Էրդողանին այդպես էլ չի տվել: Միայն ԱԳ նախարար Գ.Վեստերվելլեն է, որ չի բացառել, թե Թուրքիա-Եվրամիություն բանակցությունները կարող են վերսկսվել 2013 թվականին: Գերմանիայի դաշնային կանցլեր Անգելա Մերկելն իր հերթին գերադասել է խոսել այն քայլերի մասին, որ պետք է իրագործի պաշտոնական Անկարան: Ըստ կանցլերի՝ Գերմանիան բանակցությունները շարունակելու կողմնակից է և կարծում է, որ թե՛ վարչապետ էրդողանը, թե՛ Եվրամիության կառույցներն ու անդամ պետությունները ազնվորեն կվարեն այդ բանակցությունները:

Ուշագրավ է, որ Թուրքիայի և Եվրամիության միջև անդամակցության շուրջ բանակցությունները բաժանված են 35 առանձին ոլորտների: Դրանցից միայն մեկի՝ գիտության ոլորտի շուրջ բանակցություններն են, որ ամբողջությամբ ավարտված են: