Կա գնի թանկացում նոմինալ, և կա գնի թանկացում կրիմինալ. Արմեն Պողոսյան

«Հացի թանկացման պատճառները շատ ակնհայտ են, իսկ պատճառը գերկենտրոնացումն է»,-Լուրեր.com-ի հետ զրույցում ասաց սպառողների ասոցացիայի նախագահ Արմեն Պողոսյանը:

«Ես ստույգ չեմ հիշում, բայց ցորենի կամ ալյուրի ներկրողները երկուսով գերակշռում են 70%-ը»,-ասաց Պողոսյանը՝ հավելելով, որ դա հակասում է տնտեսական օրինաչափություններին:

«Մեր օրենսդրությամբ՝ եթե մեկը գրավում է 30%-ից ավել կամ երկուսով 50%-ից ավել, դա արդեն ուշադրության կենտրոնում է հայտնվում, և տնտեսական մրցակցության պետական հանձնաժողովի և ֆինանսական հոսքերի նկատմամբ ավելի մանրակրկիտ պետք է ուշադրություն դարձնեն: Դա դեռ պատժելի արարք չէ, եթե ամեն ինչ օրինական է և ոչ թաքցված, մութ կետեր չկան: Դա պատժելի չէ, բայց դրան յուրահատուկ ուշադրություն է դարձվում, որպեսզի չչարաշահեն, իսկ մենք տեսնում ենք այդ չարաշահման վառ օրինակը»,-նշեց սպառողների ասոցացիայի նախագահը:

Նրա խոսքերով՝ միջազգային շուկայում լինում են տատանումներ՝ և՛ աճելու, և՛ նվազելու, իսկ մեզ մոտ միշտ անդրադառնում է միայն աճելու կողմը:

«Այժմ, ով մանրածախ շուկայում հաց է վաճառում, ինչքան էլ բարձրացնում է գինը, դա իրենց նախաձեռնությունը չէ, այլ այդ հավելյալ գոյացող գումարները գնում են այնտեղ, որտեղից ներկրվում է ցորենը կամ այլուրը, իսկ խնդիրը ոչ թե թխող և վաճառող սուբյեկտներն են, այլ այն խոշոր հոսքը, որ գալիս է»,-ասաց Արմեն Պողոսյանը:

Նա նշեց նաև, որ կա գնի թանկացում նոմինալ, և գնի թանկացում կրիմինալ: «Այսինքն՝ բացի այն նոմինալ թանկացումից, որը մենք տեսնում ենք, կան նաև քաշի մեջ զեղծարարություններ՝ քաշը պակասեցնելու և քողարկված ձևով թանկացնելու: Ոչ մի սպառող չի կարող 7, 8 գրամի տարբերությունը կշռել ու բացահայտել, և դա պետք է անեն պետական մարմինները։ Մենք հոկտեմբերի 18-ին ուղարկել ենք նամակ ՀՀ նախագահի վերահսկողության ծառայողությանը՝ առաջարկելով համատեղ վերլուծել քաշերի ու գների համապատասխանությունը և ըստ այդմ էլ քայլեր ձեռնարկել: Նամակին դեռևս արձագանք չկա»,- ասաց Պողոսյանը: