Զարուհի Փոստանջյանը՝ Ռուբեն Հայրապետյանի մասին (տեսանյութ)

Ինչպես արդեն Lurer.com-ը տեղեկացրել էր այսօր մեկնարկեց թիվ 1 ընտրատարածքում դեկտեմբերի 2-ին կայանալիք Ազգային ժողովի մեծամասնական ընտրակարգով պատգամավորի թեկնածու, «Ժառանգության» վարչության քարտուղար Ստյոպա Սաֆարյանի նախընտրական քարոզարշավը։

Ստեփան Սաֆարյանին եկել էին շնորհավորելու իր կուսակից ընկերներ Զարուհի Փոստանջյանը, Արմեն Մարտիրոսյանը, Հովսեփ Խուրշուդյանը, Անահիտ Բախշյանը, Ռուբեն Հակոբյանը, ինչպես նաև «Ժառանգություն» կուսակցության նախագահ Րաֆֆի Հովհաննիսյանը։

ԱԺ «Ժառանգություն» խմբակցության պատգամավոր Զարուհի Փոստանջյանն իր ելույթում մասնավորապես նշեց.

«Ոչինչ, որ այսպես է ստացվել, և մենք նորից ենք մասնակցում ընտրություններին։ Մենք մասնակցում ենք, որովհետև մեզանից վերցրածը մենք պարտավոր ենք ետ վերադարձնել, իսկ մեզանից վերցրել են ոչ թե ազնվորեն, այլ մեզանից գողացել են, և գողությանը պետք է հաջորդի պատիժ։ Մենք եկել ենք և ասում ենք, որ այո, մենք նորից առաջադրվում ենք։ Ստյոպա Սաֆարյանը հայտը ներկայացրել է հաղթանակի համար։

Ասում է, որ գալիս է և վերականգնելու է այն հաղթական ճանապարհը, որը պարտավոր ենք մենք անցնել բոլորս միասին։ Գալիս է, և ասում է՝ այո, պատգամավորը պետք է լինի Ստյոպա Սաֆարյանի նման անձնավորություն, այլ ոչ թե նախկինը, ով ներկայացրեց մի շատ կարճ ժամանակ այս 2012 թվականի ընտրություննեից հետո, և մենք տեսանք՝ ինչպես էր նա ներկայացնում մեր բնակչությանը ԱԺ-ում։ Մենք ասում ենք, որ այլևս նման մարդիկ չպետք է ներկայացված լինեն ԱԺ-ում, այլ պետք է ներկայացված լինեն ազնվագույն քաղաքացիներ, ովքեր հետապնդելու են մեր իրավունքների իրացումը, քաղաքացիներ, ովքեր ներկայացնելու են մեզ տարբեր ատյաններում, ովքեր ներկայացնելու են մեզ արժանվույնս, այլ ոչ թե գալու են ԱԺ, սեղմելու են կոճակները և ընդհանրապես ձայն չեն հանելու, և մեր քաղաքացիները պետք է տարիներ շարունակ դիմումներ գրեն և չստանան դրանց պատասխանները»։

Հիշեցնենք, որ մայիսի 6-ին թիվ մեկ ընտրատարածքից մեծամասնական ընտրակարգով պատգամավորի թեկնածու էր ընտրվել ՀՀԿ-ական Ռուբեն Հայրապետյանը, ով մանդատը վայր դրեց «Հարսնաքար» ռեստորանում տեղի ունեցած միջադեպից հետո, որտեղ դաժան ծեծի էին ենթարկվել ռազմական բժիշկներ, իսկ Վահե Ավետյանը դաժան ծեծի արդյունքում միջադեպից մի քանի օր անց, գիտակցության չգալով, մահացավ։