Ալիևի Բյուլբյուլի հիստերիան, կարգին պիջակավորների «վիրահատությունն» ու Րաֆֆի Հովհաննիսյանի շտաբը

Հայաստանի և Ադրբեջանի արտգործնախարարների հանդիպումից առաջ հարցազրույցներից մեկում Շավարշ Քոչարյանն արտահայտեց արդեն ծեծված իրականությունն Ադրբեջանի մասին՝ նրան բնութագրելով որպես միջնադարյան մտածելակերպով առաջնորդվող երկիր։ Հանդիպումից հետո էլ պարոն Քոչարյանի խոսքերը հաստատեցին ադրբեջանական «հիստերիաները»՝ ի դեմս Ալիևի, ով հայտարարեց, որ Շուշիում շուտով կկանգնեցվի հայտնի գործիչ Բյուլբյուլի արձանը։ Նրանց հիստերիաներին զսպաշապիկ հագցրեց Էդուարդ Շարմազանովը, ով Ալևի երազանքներին տվեց «ջայլամի» թևեր, հայտարարելով, որ դրա հնարավորությունը սպառված չէ. «Ադրբեջանը պետք է ճանաչի Արցախի անկախությունը, դիվանագիտական հարաբերություններ հաստատի Արցախի հանրապետության հետ, բացի դեսպանատուն Շուշիում և իր դեսպանատան շենքում իր իսկ ճաշակով տեղադրի Բյուլբյուլի կամ այլ գործիչների արձանները»: Ի դեպ, շատ հնարավոր է՝ պայծառամիտ Իլհամ Ալիևը պատրաստվում է վերոնշյալ Բյուլբյուլի արձանը Հայաստան  ուղարկել բռնցքամարտի Ադրբեջանի ազգային հավաքականի հետ, ովքեր հաստատել են իրենց մասնակցությունը Երևանում կայանալիք աշխարհի երիտասարդական առաջնությանը: Եթե նրանց այդ անել չհաջողվի, գոնե կտեսնեն մի երկիր, որտեղ ծնվել են Արթուր Աբրահամի նման բռնցքամարտիկներ, և որը նրանց համար կարող է դառնալ խթանիչ ուժ հետագայի համար: Ի դեպ, Արթուր Աբրահամը Բռնցքամարտի համաշխարհային կազմակերպության (WBO) 25-րդ ամենամյա համագումարում պարգևատրվեց պատվոգրով դիտարժան մրցելույթի համար: Այնուհետև շատ չանցած աշխարհի ամենաժողովրդավար, խաղաղասեր ու մարդասեր երկիր ԱՄՆ-ն վերջերս շահագործման հանձնված Ստեփանակերտի օդանավակայանի գործունեության կապակցությամբ շահագրգիռ կողմերին կոչ արեց հարցը լուծել միջազգային իրավունքի և քաղաքացիական ավիափոխադրումների ոլորտում Հայաստանի և Ադրբեջանի ընթացիկ պրակտիկայի հիման վրա: Վերջում էլ Պետդեպարտամենտի խոսնակ Վիկտորիա Նուլանդը դրեց վերջակետ, նշելով, որ օդանավակայանի գործունեությունը չի կարող օգտագործվել ԼՂՀ կարգավիճակի փոփոխության համար, որին հետևեցին Հայաստանում ԱՄՆ-ի դեսպան Հեֆերնի «կռուտիտ հայտարարություններն» այն մասին, որ ՆԱՏՕ-ն էլ իր հերթին ԼՂ հարցը խաղաղ ճանապարհով լուծելու շահագրգիռ կողմերից է, չնայած նրան, որ խնդիրը ԵԱՀԿ Մինսկի խմբի շրջանակներում է ընթանում:

Հեֆերնից հետ չմնալու համար էլ մեր նորաձևությանը հետևող բարձրաճաշակ քաղաքական գործիչներն էլ սկսեցին հայտարարություններ շռայլել՝ առանց բովանդակությանն ուշադրություն դարձնելու: Դրանց արդյունքում, օրինակ, պարզվեց, որ պատգամավորի աշխատավարձով մի կարգին պիջակ էլ հնարավոր չէ ձեռք բերել՝ գնել էլի, այսպիսի հայտարարությամբ հանդես եկավ ԲՀԿ-ական պատգամավոր Տիգրան Ուրիխանյանը: Հետաքրքրականն այն է, որ երբեք ԱԺ ամբիոններից չի հնչեցվել, օրինակ, այսպիսի մի հռետորական հարց՝ ինչպե՞ս կարող է մարդ ապրել ամսեկան 30 հազար դրամ աշխատավարձով ու ինչու են մարդիկ կարում իրենց բերանները: Արդարադատության նախարարն էլ դրա փոխարեն այդ ահասարսուռ արարքը համարում է սովորական երևույթ և համեմատում է աղջիկների ականջ ծակելու հետ: Նախարարին այդ քայլի համար նկատողություն արեց ԲՀԿ նախագահ Գագիկ Ծառուկյանը՝ ուղորդելով դրա հետաքննությանը: Բայց այսքանով չսահմանափակվեցին մեր քաղաքական դաշտի գործիչները. պարզվեց, որ այս նախագահական ընտրություններում ՀՀԿ նախընտրական շտաբի պետի պաշտոնը նորից կզբաղեցնի ԱԺ-ի նախագահ, հավերժ շտաբի պետ Հովիկ Աբրահամյանը: Իսկ այդ նախագահականին իր թեկնածությունը նաև կառաջադրի Րաֆֆի Հովհաննիսյանը. այդ մասին հայտարարեց հենց ինքը, բայց շտաբի պետի մասին խոսակցություն չբացեց, որ «խայտառակ» չլինի ՀՀԿ-ական գործընկերների մոտ, քանի որ իր թիմում չկա Հովիկ Աբրահամյան: Վերջում էլ կառավարության նիստում վարչապետ Տիգրան Սարգսյանը հայտարարեց, որ խորհդակցելով ՍԵրժ Սարգսյանի հետ՝ եկել է այն եզրահանգման, որ չբավարարվածության միտումներ են նկատվում ստեղծված իրավիճակում և որ վրա է հասել կոռուպցիային վիրահատելու ժամանակը: Վիրահատությունից խոսեցին, միանգամից հիշեցի առողջապահական ոլորտը ի դեմս նախարարի, ով համամիտ է վարչապետի հետ և կոնսերվատիվ բուժումները անօգուտ համարելով՝ կողմ է վիրահատական մեթոդներին: Բայց դե արի ու մի ասա, որ «Փթախտի» դեպքում ո՛չ կոնսերվատիվ բուժումներն են օգնում, ո՛չ էլ վիրահատական մեթոդները: Եվ որպեսզի վերջում ստացվի այդքան սպասված ՇՈՇԱՓԵԼԻ արդյունքը, մնում է միայն ամպուտացիայի միջոցով հեռացնել «Կոռւպցիայի»՝ փթած մասերը բռնելով գլխից: Խոսելով մյուս ախտից՝ այս անգամ սիբիրախտից, հանրապետության գլխավոր անասնաբույժը հայտարարեց, որ սիբիրախտով հիվանդ կենդանիներ չկան. ասե՛ք, որ իսկապես հուսադրող է: Հուսանք՝ այս շաբաթը կտարբերվի նախորդից լավ իրադարձությունների քանակի ավելացմամբ:  

Շաբաթվա բոլոր օրերին երջանկություն և ուրախություն, միայն հաճելի ու անմոռանալի պահեր ողջ կյանքի համար:

Գևորգ Ավետիսյան