Հայաստանը խորացնում է իր հարաբերությունները ԱՄԷ–ի հետ

Աշխատանքային այցով Արաբական Միացյալ Էմիրություններում գտնվող ՀՀ փոխվարչապետ, տարածքային կառավարման նախարար Արմեն Գևորգյանը նոյեմբերի 5-ին մի շարք հանդիպումներ է ունեցել, որոնց ընթացքում քննարկվել են երկկողմ համագործակցության խորացման հարցեր:

ԱՄԷ արտաքին առևտրի նախարար շեյխ Լուբնա ալ Քասիմիի հետ հանդիպմանը քննարկվել են երկկողմ առևտրատնտեսական կապերի ակտիվացման, առևտրաշրջանառության ծավալների ավելացմանն առնչվող հարցեր:

Զրուցակիցներն արձանագրել են, որ վերջին տարիներին զգալի քայլեր են արվել երկու երկրների միջև համագործակցությունը խորացնելու, դրանց գործնական բնույթ հաղորդելու ուղղությամբ: Երկուստեք սակայն ընդգծվել է, որ պետք է արվի ավելին` առկա ներուժի իրացման ուղղությամբ:

Փոխվարչապետը նշել է, որ Հայաստանն սկսել է ակտիվ աշխատել տարածաշրջանի մյուս երկրների հետ և մեծ նշանակություն է տալիս ԱՄԷ-ի հետ ձևավորված արդյունավետ փոխգործակցության զարգացմանը: Նա ընդգծել է, որ հայկական կողմը կարևորում է Հայաստան- ԱՄԷ միջկառավարական համագործակցության հանձնաժողովի գործունեության մեկնարկը` դիտարկելով հանձնաժողովի աշխատանքը որպես երկկողմ առևտրատնտեսական կապերի ակտիվացմանը նպաստող բացառիկ հարթակ: «Հայաստանը մեծ նշանակություն է տալիս ԱՄԷ-ի հետ համագործակցության զարգացմանն ու խորացմանը, և մենք շահագրգռված ենք զարգացնել երկկողմ հարաբերությունները հատկապես առևտրատնտեսական ու ներդրումային ոլորտներում: Հայաստանում ներդրումային լայն հնարավորություններ կան, որտեղ կցանկանայինք տեսնել ԱՄԷ-ին»,-նշել է փոխվարչապետը:

Ա. Գևորգյանը միաժամանակ վերահաստատել է Հայաստան- ԱՄԷ միջկառավարական հանձնաժողովի նիստը Երևանում անցկացնելու հայկական կողմի պատրաստակամությունը:

Քննարկվել են նաև երկրորդ գործարար համաժողովի անցկացման հետ կապված հարցեր: Նշելով 2010թ. Երևանում անցկացված առաջին համաժողովի դրական փորձը` քննարկվեց երկրորդը Էմիրություններում կազմակերպելու հնարավորությունը: Պայմանավորվածություն ձեռք բերվեց համաժողովը կազմակերպել ԱՄԷ-ում անցկացվելիք նմանատիպ միջազգային համաժողովների շրջանակում, ինչը հնարավորություն կտա հայ գործարարներին կապեր հաստատել ոչ միայն Էմիրությունների, այլ տարբեր երկրների գործընկերների հետ:

Փոխվարչապետը տեղեկություններ է ներկայացրել Հայաստանում իրականացվող տարածաշրջանային նշանակության ծրագրերի ընթացքի մասին. նշվեց, որ արդեն մեկնարկել են «Հյուսիս-հարավ» ճանապարհային միջանցքի, ուռուցքաբանության գերժամանակակից կենտրոնի ծրագրերը: Ակտիվություն է նկատվում զբոսաշրջության, գյուղմթերքի արտահանման, շինարարության ոլորտներում, և Հայաստանը պատրաստակամ է նշված ոլորտում փոխշահավետ ծրագրեր իրականացնել նաև ԱՄԷ-ի հետ: Այս համատեքստում նա ողջունելի է համարել «Մաջիդ ալ Ֆուտտեյմ» ընկերության մուտքը հայկական շուկա:

Կարևորվել է նաև գործարար շփումների ակտիվացումը: Կողմերը նկատել են, որ Էմիրությունների շուկան հայկական ապրանքների համար կարող է տարածաշրջանային շուկաներ մուտքի լավ հնարավորություն հանդիսանալ: Նշվել է, որ երկու երկրների միջև «FlyDubai» ավիաընկերության միջոցով ուղիղ ավիափոխադրումների իրականացումից հետո առաջընթաց է նկատվում ինչպես զբոսաշրջության ոլորտում, այնպես էլ առևտրատնտեսական հարաբերություններում:

Արձանագրվել է, որ Հայաստանից ներկայումս ԱՄէ արտահանվող գյուղմթերքը` հիմնականում սունկ և հատապտուղներ, հետաքրքրություն է ներկայացնում տարածաշրջանի այլ երկրների շուկաների համար, ինչպես նաև անհրաժեշտություն կա ավելացնել խմելու և հանքային ջրի արտահանման ծավալները: Զրուցակիցները քննարկել են նաև բնապահպանության ոլորտում համագործակցության հնարավորությունները: