Հաղորդավար Վլադիմիր Պոզները լքում է Ռուսաստանը

Հայտնի ռուս լրագրող հաղորդավար Վլադիմիր Պոզները լքում է Ռուսաստանի Դաշնությունը և տեղափոխվում Ֆրանսիա. հայտնում է Fognews-ը:

Կիրակի օրը՝ նոյեմբերի 11-ին, ռուսական Առաջին ալիքի հեռուստադիտողները կդիտեն «Պոզներ» հեղինակային հաղորդաշարի եզրափակիչ թողարկումը: Ամեն բան սկսվեց նրանից, որ «Եդինայա Ռոսիա» կուսակցության պատգամավոր Իլյա Կոստունովն իր միկրոբլոգում գրել էր. «Ես կարծում եմ, որ Վլադիմիր Պոզները կա՛մ պետք է բացատրություն տա ռուսական դատարանների մասին հայտնած իր կարծիքի համար, կա՛մ ներողություն խնդրի, կա՛մ էլ լքի Առաջին ալիքը»:

Հաղորդաշարի նախկին թողարկման ժամանակ հնչած արտահայտությունը, որը տրամադրել էր պատգամավորին Պոզների դեմ, հետևյալն էր. «Երբ պարոն Մարկինն ասաց, որ ինքը Ռազվոզժաևը իր ձեռքով գրել է 10 էջ մեղայական, ես քիչ մնաց վայր ընկնեի աթոռից: Չէ՞ որ պարոն Մարկինը շատ լավ գիտի, թե ինչպես և ինչ միջոցներ կիրառելով են նման մեղայականներ գրվում, և որ դրանցից ԱԱԾ-ի արխիվներում միլիոններով կան»:

Կոստունովը ԶԼՄ-ներին հայտարարել է, որ 3 պետությունների քաղաքացի հանդիսացող հայտնի հեռուստալրագրողը պետք է պատասխան տա իր այն խոսքերի համար, որով նա ռուսական Հետաքննչական կոմիտեի գործողությունները համեմատել է ԱԱԾ-ի վատագույն տարիների կիրառած բռնության մեթոդների հետ:

Պոզները նրա ելույթն անպատասխան չի թողել. «Տեսնում եմ, որ Ռուսաստանն իրոք դարձել է միասնական: Դատարկախոսների, հիմարների և տգետների միասնական Ռուսաստան: «Եդինայա Ռոսիա»-ի պատգամավորների մի խումբը օրենքներ է ընդունում, որոնք արգելում են կատուներին գիշերները տմբտմբացնել հատակին, իսկ մեկ այլ խումբ ազգայնական խորհրդանիշներով ռուսական մարշեր է կազմակերպում: Ես աթեիստ եմ և հավատում եմ, որ առաջացել եմ կապիկից, այն կապիկից, որին աշխատանքն ու գիտելիքը մարդ դարձրին՝ ի հակադրություն այն պատգամավորների, որոնք բոլորը աստվածավախ են դարձել, և որոնց բոլորին Աստված է ստեղծել: Այդ աստվածաստեղծ պատգամավորներն են ազգայնական մարշեր կազմակերպում: Նրանք ավելի շատ են կապիկների հիշեցնում: Ուստի և նրանք դեռ երկար ճանապարհ ունեն անցնելու, մինչև մարդ դառնալու էվոլյուցիան կավարտվի նրանց մոտ: Հնարավոր է, որ մի օր նրանցից մարդիկ դուրս գան: Սակայն ես ծեր մարդ եմ և այդքան երկար չեմ կարող սպասել: ես ցավում եմ, որ ստիպված եմ լքել Ռուսաստանը: Սակայն մարդ դառնալով՝ ես այլևս չեմ կարող կիսել կապիկների հետ նույն երկրիը»: