«Արմավիան» սահմանեց նոր անբարոյականության ռեկորդ. Պավել Մանուկյան

Այսօր լրագրողների հետ հանդիպման ժամանակ «Զվարթնոց» ավիաօդերևութաբանական կենտրոնի տնօրենի ժամանակավոր պաշտոնակատար Պավել Մանուկյանը հայտարարեց, որ «Արմավիա» ավիաընկերությունը «Զվարթնոց» ավիաօդերևութաբանական կենտրոնին պարտք է 93 մլն դրամ, որը կուտակվել է ամեն թռիչքի համար ծառայության դիմաց գանձվող գումարից, որը կազմում է 33 000 դրամ, ինչպես նաև հավելեց, որ եթե «Արմավիան» չվճարի իրենց պարտքը, ապա «Զվարթնոց» ավիաօդերևութաբանական կենտրոնը կարող է լուծարվել, քանի որ չեն կարողանում վճարումներ կատարել օդանավակայանին։ «Իսկ դա նշանակում է, որ ոչ մի չվերթ չի լինելու, չեն լինի նաև արտասահմանյան չվերթները, եթե կապը կտրվի արտասահմանյան բանկերի հետ»,-ասաց Մանուկյանը։

«Արմավիան սահմանեց նոր անբարոյականության ռեկորդ, որը գերազանցեց անցած տարվա իր ռեկորդը։ Անցած տարվա պարտքը կազմում էր մոտ 48 մլն դրամ, իսկ այս տարի արդեն անցնում է 93 միլիոնը»,-նշեց Պավել Մանուկյանը։

Այդ նույն ընկերության իրավաբան Անահիտ Գրիգորյանը հայտնեց, որ իրենք հայցադիմումով պատրաստվում են գործը մտցնել դատարան, բայց կրկին առկա ֆինանսական խնդիրների պատճառով, այդ ընթացքը դանդաղում է:

«Արմավիայի» հետ միշտ էլ խնդիրներ ունեցել ենք: Վերջին երկու ամսվա ընթացքում նրանց կողմից վճարումներ ընդհանրապես չեն եղել: Իսկ մյուս ամիսների ընթացքում կարող էին վճարել, օրինակ՝ ընդամենը 500 հազար դրամ, որը իրենց կատարած թռիչքների 1-2%-ն է: Դրա հետևանքով մենք չենք կարողանում կատարել մեր հարկային վճարումները, որին պարտք ենք մոտ 17 մլն դրամ»,- նշեց Անահիտ Գրիգորյանը:

Օդերևութաբանական ընկերությունը որոշել է ստեղծված իրավիճակը լուծելու համար սկզբնական ժամանակում «Արմավիային» պարզապես տեղեկատվություն չտրամադրել, իսկ եթե իրենց տնտեսությունը կանգնի քայքայման եզրին, ստիպված կլինեն բոլոր ավիաընկերություններին նման ինֆորմացիա չտալ:

«Ավիաընկերությունների համար օդերևութաբանական տվյալների ինֆորմացիան բաց է, նրանք այն կարող են վերցնել և՛ բանկերից, և՛ կենտրոնից,-ասաց ընկերության տեխնիկական ծառայության պետ Գառնիկ Պետրոսյանը:

«Մենք միջոցներ չենք կարող ձեռնարկել «Արմավիայի» դեմ, և շատ հնարավոր է, որ դրանից էլ օգտվելով՝ նրանք վճարումներ չեն իրականացնում, որովհետև ամեն դեպքում այդ ինֆորմացիան լեգալ, թե անլեգալ ճանապարհով, նրանց հասնում է»,-հավելեց ընկերության տեխնիկական ծառայության պետ Գառնիկ Պետրոսյանը:

Ինֆորմացիա չտրամադրելու որոշման մասին Օդերևութաբանական ընկերությունը խոստացավ հայտնել բոլոր ավիաընկերություններին մոտ օրերս: