Փոխվարչապետը հանդիպեց Ռաս ալ Խայմա էմիրության կառավարչի հետ
Վերջին լուրեր
ՀՀ փոխվարչապետ, տարածքային կառավարման նախարար Արմեն Գեւորգյանն ԱՄԷ կատարած աշխատանքային այցի շրջանակում այսօր հանդիպեց Ռաս ալ Խայմա էմիրության կառավարիչ շեյխ Սաուդ բին Սակր ալ Քասիմիի հետ:
Քննարկվեցին Հայաստանի հետ էմիրության տնտեսական համագործակցությանն առնչվող հարցեր, անդրադարձ եղավ էմիրության կողմից Հայաստանում իրականացվող ներդրումային ծրագրերի ընթացքին ու փոխգործակցության ընդլայնման հեռանկարներին: Փոխվարչապետն ընդգծեց Ռաս ալ Խայմայի կարեւոր դերը Հայաստան- ԱՄԷ համագործակցության մեջ եւ հույս հայտնեց, որ հետագա փոխշահավետ ծրագրերի իրականացումը կնպաստի երկկողմ առեւտրատնտեսական կապերի ընդլայնմանը:
Ռաս ալ Խայմայի կառավարիչը մասնավորապես անդրադարձավ հանքարդյունաբերության ոլորտում իրականացվող ծրագրերին եւ դրանց ընդլայնման մտադրություններին: Նա նաեւ վստահություն հայտնեց, որ «Մաջիդ ալ Ֆուտտեյմ» ընկերության հետ իրենց համագործակցությունը՝ Երեւանի Ավան թաղամասում ներդրումային ծրագրի հետ կապված, նույնպես կնպաստի երկկողմ առեւտրատնտեսական կապերի ամրապնդմանը:
Զրուցակիցները կարեւորեցին փոխայցելությունների կազմակերպումը, որոնք լրացուցիչ խթան կհանդիսան կապերի ակտիվացման, փոխգործակցության նոր հնարավորությունների բացահայտման համար: Երկուստեք անհրաժեշտ համարվեց նաեւ գործարարների ուղիղ շփումների կազմակերպումը, որի համար լավ հնարավորություն կարող են լինել նաեւ երկու երկրների միջեւ կազմակերպվող գործարար համաժողովները:
Նշենք, որ Հայաստանի կառավարության եւ Ռաս ալ Խայմայի էմիրության միջեւ 2007թ. ստորագրվել է տնտեսական համագործակցության վերաբերյալ փոխըմբռնման հուշագիր:
ՀՀ փոխվարչապետն ավարտելով աշխատանքային այցը Արաբական Միացյալ Էմիրություններ՝ մեկնեց Իրաքի Հանրապետություն, որտեղ Ա. Գեւորգյանի համանախագահությամբ նոյեմբերի 7-ին տեղի կունենա Տնտեսական համագործակցության հարցերով հայ-իրաքյան միջկառավարական համատեղ հանձնաժողովի առաջին նիստը:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
