Անհասանելի պաշտոնյան

Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը ստանում է 720 հազար դրամ աշխատավարձ: 2013թ. ՏՄՊՊՀ-ն բյուջեից կստանա դարձյալ 200 մլն դրամ, որը ծախսվում է հիմնականում աշխատավարձերի վրա: Հանձնաժողովն ունի 76 աշխատող՝ ներառյալ տեխնիկական անձնակազմը:

Այս հանձնաժողովը կոչված էր դառնալու հայրենական արտադրության օլիգարխների ահ ու սարսափը: Ճիշտ է, երբեմն-երբեմն հանձնաժողովը կենդանության նշաններ է ցույց տալիս՝ տուգանելով խոշոր «շնաձկներից» մեկն ու մեկին, սակայն ասել, թե դրանից հետո Արտակ Շաբոյանի անունը լսելիս հայրենի օլիգարխները տեղ են ման գալիս, որ թաքնվեն, սուտ կլինի: Անգամ այն բանից հետո, երբ նախագահն անձամբ հավաստիացրեց, թե անպատիժ մոնոպոլիստներ չեն կարող լինել, հանձնաժողովի աշխատանքը ժպիտով է ընկալվում:

Արդյո՞ք նույն այդ օլիգարխների կողմից փորձեր չեն արվում՝ «լեզու գտնել» իրենց «սանձել կոչվածի» հետ: Առանց այն էլ խոսակցություններ են պտտվում, թե անգամ միլիոնների տուգանքները զուտ ժողովրդի աչքին «թոզ փչելու» համար են, դրանք նախնական պայմանավորվածությունների արդյունք են, որի հետևում շարունակվում է անմրցակից օլիգոպոլիաների բնականոն աշխատանքը:

Արտակ Շաբոյանն այսօր Ազգային ժողով էր եկել: Օգտվելով առիթից՝ փորձեցինք ՏՄՊՊՀ նախագահից պարզել՝ միջնորդություններ, կաշառելու փորձեր արվու՞մ են, թե՞ ոչ:

- Պ-ն Շաբոյա՛ն, Ձեզ երբևէ Կաշառք առաջարկե՞լ են: Չեմ հարցնում վերցրել եք:

- Ո՛չ, ընդհանրապես, ինձ չեն առաջարկում, որովհետև ինձ մոտենալը շատ դժվար ա:

- Այսի՞նքն՝ անհասանելի՞ եք, ինչո՞վ է դժվար՝ վախենու՞մ են Ձեզանից:

- Ես անհասանելի եմ, այո՛, անհասանելի եմ: Աշխատում եմ ինչքան հնարավոր ա անհասանելի ըլնել: Ինչի՞ եք զարմանում:

- Դե, ես Ձեզ մի երկու անգամ տեսել եմ էնպես ռեստորաններում մի տեսակ կասկածելի հանդիպումներ՝ կուպեներում, չգիտեմ՝ ինձ վրա մի փոքր այլ տպավորություն է թողել:

- Դե, գիտե՞ք, Դուք շատ սխալ գիտեք: Եթե կարաք օրինակ բերեք: Կարաք՝ ասեք և կհամոզվեք, որ Դուք սխալ եք:

- Մի անգամ, օրինակ, արաբական ռեստորանում ես Ձեզ տեսել եմ՝ կարծես կոնֆիդենցիալ հանդիպում ունեիք, կարծես պաշտոնական հանդիպում լիներ՝ տեղափոխված ոչ պաշտոնական միջավայր, պորտապար էին պարում, դուք էլ ինչ-որ բան էիք քննարկում:

- Ո՞ր արաբական ռեստորանը:

- Սախարովի հրապարակի վրա:

- Ճիշտ եք, իմ հորեղբոր տղայի հետ՝ Ալբերտ Ղազարյանի հետ: Իր հետ, որը նույնպես պետական պաշտոնյա ա:

- Նրա միջոցով չե՞ն կարող Ձեզ միջնորդե՞լ, ինչ-որ բանի հասնե՞լ: Ձեր բարեկամների միջոցով միջնորդություններ չե՞ն արվում:

- Ինքը իմ հորեղբոր տղան ա, պարբերաբար հանդիպում ենք, ո՛չ, ոչ մի միջնորդություն չի արվում:

- Լավ, եղավ:

Լուսինե Կեսոյան