Ես կքվեարկեմ Ռամոսի օգտին. Իկեր Կասիլյաս

Մադրիդի «Ռեալի» և Իսպանիայի հավաքականի դարպասապահ Իկեր Կասիլյասն անդրադարձել է Եվրոպայի լավագույն ֆուտբոլիստի քվեարկությանը և հայտարարել այն ֆուտբոլիստի անունը, ում համար քվեարկելու է, տեղեկացնում է france football-ը:

«Ոսկե Գնդակի» թեկնածուն, ի տարբերություն իր խաղընկերոջը՝ Ռոնալդուին, ով հայտարարել էր, որ հնարավորության դեպքում կքվեարկեր իր օգտին, Կասիլյասը բացառել է ինքն իր օգտին քվեարկելու տարբերակը. «Ես պարզապես չեմ հասկանում, ինչպե՞ս կարող ես քվեարկել ինքդ քեզ համար: Ես չպետք է գնահատեմ իմ խաղը, այլ դա պետք է անեն ուրիշները»:

Իսպանացի ֆուտբոլիստը նշել է նաև, որ ցանկանում է «Ոսկե Գնդակին» արժանանալ առաջին հերթին նրա համար, որ լավագույն ֆուտբոլիստի կոչման պայքարում վերջ դնի դարպասապահների նկատմամբ խտրական վերաբերմունքին:

«Միակ խաղացողը դաշտում, առանց որի թիմի խաղը, ըստ էության, անհնար է, դարպասապահն է», -նշել է ֆուտբոլիստը:

Մադրիդցիների ավագը նշել է նաև, որ լավագույն ֆուտբոլիստի կոչման համար քվեարկելու է իր թիմակից Սերխիո Ռամոսի օգտին: Ինչպես նաև առանձնացրել է Քրիշտիանու Ռոնալդուին և Չավիին:

Անդրադառնալով ակումբի գլխավոր մարզչին՝ Կասիլյասը հայտարարել է.

««Ռեալը» Մոուրինիուի գլխավորությամբ միջազգային արենայում վերադարձրեց իր հեղինակությունը: Բացի դա մենք վերադարձրինք չեմպիոնական տիտղոսը և դադարեցինք «Բարսելոնային» զիջել մեր խաղամակարդակով»: