Գյուլ-Էրդողան առճակատում. Թուրքիայում սպասվում են լուրջ ցնցումներ

Թուրքիայում է՛լ ավելի է սրվել վարչապետի եւ նախագահի միջեւ առճակատումը՝ երկրի կառավարման ղեկը ստանձնելու շուրջ, երկուսն էլ հրապարակավ մեկը մյուսին մատնանշում են սեփական լիազորությունների շրջանակները: Հարաբերությունները սրվել էին Թուրքիայի Հանրապետության տոնի առթիվ օրեր առաջ Անկարայում կազմակերպված միջոցառումներից հետո, երբ Ռեջեփ Թայիփ Էրդողանի կառավարությունը արգելել էր ընդդիմադիրներին բողոքի ցույց անցկացնել Թուրքիայի Հանրապետության հիմնադիր Աթաթուրքի դամբարանի մոտ: Արգելանքը բողոքի ալիք էր բարձրացրել երկրում, փողոցներում բախումներ էին արձանագրվել, ոստիկանները բռնություններ ու ջրցան մեքենաներ էին կիրառել: Մինչդեռ նախագահ Աբդուլա Գյուլը, ըստ հրապարակումների, առավել հանդուրժողական վերաբերմունք էր դրսեւորել եւ հորդորել էր Անկարայի նահանգապետին թույլատրել ընդդիմադիրների երթն ու հանել բարիկադները:

Ուշագրավ է, որ Գյուլի այս դիրքորոշումն ակնհայտորեն զայրացրել էր կառավարության առաջնորդին, ով նախ ասել էր, թե կասկածում է, որ նախագահը կարող է նման բան ասած լինել, հետո էլ ակնարկել, որ ասելու դեպքում Գյուլն անցել է իր լիազորությունները: Հատկանշական է, որ հայտարարությունից հետո արձագանքը շատ չի ուշացել: Թուրքիայի նախագահը, ընդունելով Բոսնիա-Հերցեգովինայի դեսպանին և օգտագործելով առիթը՝ նշել է. «Չկա առավել նորմալ բան, քան այն, որ ես՝ որպես նախագահ, կոչ եմ անում իշխանություններին ըստ արժանվույն անցկացնել Հանրապետության օրվան նվիրված տոնակատարությունները՝ ողջ երկրով մեկ»։ Ընդ որում, Գյուլն ընդգծել է, որ ինքը դեմ է երկգլխանի կառավարմանը, և եթե պետք է լինի մեկ գլուխ, ապա դա հենց նախագահինն է, ինչն ամրագրված է նաեւ Թուրքիայի սահմանադրությամբ ու օրենքներով։ Փոխադարձ այս հայտարարություններից հետո, թուրքական Zaman-ի հաղորդմամբ, նախագահը վարչապետին հրավիրել է նախագահական «Չանկայա» պալատ: Հանդիպման մասին, սակայն, մանրամասներ չեն հաղորդվում: Փոխարենը ընդդիմադիր կուսակցություններն են ողջունում նախագահ Գյուլի դիրքորոշումն ու ակնհայտորեն աջակցություն հայտնում նրան Էրդողանի հետ տարաձայնություններում։ «Նախագահի դիրքորոշումն այս հարցի վերաբերյալ շատ տրամաբանական է», - հայտարարել է ընդդիմադիր Ժողովրդա-հանրապետական կուսակցության առաջնորդներից մեկը՝ միաժամանակ քննադատելով վարչապետ Էրդողանին։