«Ռեալ»-ը փրկվեց խաղի վերջին րոպեին. հերթական հիասթափությունը

Այսօր Չեմպիոնների լիգայի 4-րդ տուրի շրջանակներում «Արքայական ակումբը» «Սանտիագո Բերնաբեու» մարզադաշտում հյուրընկալեց Դորտմունդի «Բորուսիային»: Հանդիպումն ավարտվեց 2-2 հաշվով:

Առաջինը հաշիվը բացեցին հյուրերը։ 27-րդ րոպեին գոլի հեղինակ դարձավ Մարկո Ռոյսը։ 7 րոպե անց Պեպեն հավասարեցրեց հաշիվը: Թվում էր, թե թիմերն առաջին 45 րոպեները կավարտեն 1-1 հաշվով, սակայն խաղակեսի վերջին րոպեին Մարիո Գյոտցեի գոլի շնորհիվ թիմերն ընդմիջման գնացին դորտմունդցիների առավելությամբ:

Երկրորդ խաղակեսում Մոուրինիույի սաների տարածքային մեծ առավելությունը գոլի վերածվեց միայն հանդիպման վերջնամասում՝ 89-րդ րոպեին գոլի հեղինակ դարձավ Մեսութ Օզիլը: «Արքայական ակումբին», այնուամենայնիվ, հաջողվեց միավոր վաստակել։

Նշենք, որ այս թիմերի միջև առաջին հանդիպումն ավարտվել էր դորտմունդցիների հաղթանակով՝ 2:1 հաշվով: Ռևանշը չկայացավ, երկրպագուների հիասթափությունը մեծացավ։