Այն, ինչ մինչև հիմա արել է Ադրբեջանը, իր տարածքային ամբողջականության վերականգնում է եղել․ Իրանի ԶՈւ ԳՇ պետ

Իրանի Իսլամական Հանրապետության գլխավոր շտաբի պետ, գեներալ-մայոր Մոհամադ Հոսեյն Բաղերին անդրադարձել է հարավկովկասյան տարածաշրջանի վերջին իրադարձություններին և հայ-ադրբեջանական հարաբերություններին։

Նա նշել է, որ վերջին շաբաթների իրադարձություններով Ադրբեջանը վերականգնել է իր տարածքային ամբողջականությունը՝ հավելելով, որ բոլոր այդ տարածքներում փոքրամասնությունները պետք է ապրեն խաղաղ և ունենան հավասար իրավունքներ։

«Մի երկիր եղել է ագրեսոր և օկուպանտ, մյուսն էլ հետամուտ է եղել իր կորցրած տարածքները հետ բերելուն և իր տարածքային ամբողջականությունը վերականգնելուն։ Այն, ինչ մինչև հիմա արել է Ադրբեջանը, իր տարածքային ամբողջականության վերականգնում է եղել։ Այսինքն վերջին իրադարձություններով կարողացել է վերականգնել իր տարածքային ամբողջականությունն ու ինքնիշխանությունը։ Անշուշտ, այդ տարածքների փոքրամասնությունները պետք է ապրեն խաղաղ և մյուս քաղաքացիներին հավասար իրավունքներով»,- ասել է նա։

Իրանի ԶՈՒ ԳՇ պետի խոսքով՝ Թեհրանը հարգում է և կարևորում է Հայաստանի և Ադրբեջանի տարածքային ամբողջականության պահպանումը։

«Դա այն հարցն է, որ մենք ընդգծել ենք երկու երկրների պաշտոնատար անձանց հետ մեր հանդիպումների եւ բանակցությունների ժամանակ։ Ուստի, մենք հույս ունենք, որ, հասնելով լիակատար խաղաղության, կովկասյան տարածաշրջանը կդառնա խաղաղության եւ վերակառուցման վկան՝ առանց տարածաշրջանի աշխարհագրական եւ աշխարհաքաղաքական սահմանների փոփոխության։ Դրանից հետո պատերազմի շարունակումն արդարացում չի ունենա»,- Մոհամադ Հոսեյն Բաղերիի խոսքերը մեջբերել է mehrnews-ը։