«ՀայՌուսգազարդ»-ի կապիտալում ՀՀ-ի բաժնեմասի ավելացման ծրագիր է մշակվել

Այսօր ՀՀ կառավարության նիստում կքննարկվի «ՀայՌուսգազարդ» ընկերության կանոնադրական կապիտալում ՀՀ բաժնեմասի ավելացմանն ուղղված միջոցառումների իրականացման նախագիծը:

Վերոնշյալ քայլն արվում է «Շուկայավարման հնարավորություն ֆերմերներին» ծրագրի շրջանակներում, ինչը հնարավորություն կտա այդ գազատարներից օգտվող սպառողներին անխափան գազամատակարարում ապահովել և ՀՀ բաժնեմասը ընկերությունում ավելացնել:

ՀՀ տարբեր մարզերում կառուցվել են գազատարներ, որոնք հնարավորություն կտան խուսափել գազամատակարարման հետ առաջացած խնդիրներից:

Եվ որպեսզի կարողանան տվյալ գազատարները որպես կապիտալ ներդնել «ՀայՌուսգազարդ» ընկերությունում, առաջարկվում է նվիրաբերության պայմանագրեր կնքելու միջոցով հանձնման-ընդունման ակտերի հիման վրա իրականացնել «Գյուղական տարածքների տնտեսական զարգացման», «Արտադրական ենթակառուցվածքների վերականգնում» և «Շուկայավարման հնարավորություն ֆերմերներին» ծրագրերի շրջանակներում ձեռք բերված գույքի փոխանցումը համայնքներին, միաժամանակ առաջարկելով համայնքներին գույքը նվիրել Հայաստանի Հանրապետությանը` ի դեմս Հայաստանի Հանրապետության էներգետիկայի և բնական պաշարների նախարարության աշխատակազմի` կնքելով գույքի նվիրատվության պայմանագրեր և իրականացնելով հանձնման-ընդունման գործընթացը:

Այնուհետև` ՀՀ օրենսդրությամբ և «ՀայՌուսգազարդ» փակ բաժնետիրական ընկերության կանոնադրությամբ սահմանված կարգով լրացուցիչ բաժնետոմսեր թողարկելու և Հայաստանի Հանրապետության օգտին տեղաբաշխելու միջոցով ավելացնել ընկերության կանոնադրական կապիտալը: