Դեղորայքի վերաբերյալ հոդվածում նկարագրվածը չի համապատասխանում իրականությանը

«Հրապարակ» թերթի նոյեմբերի 6-ի թիվ 211 համարում տպագրված «Առողջարապության նախարարությունն անհայտ ծագման դեղ է ներկրել» նամակի առթիվ նախարարությունից տեղեկացնում են, որ կանադական «PARMA SCIЕNCE INC.» դեղագործական կազմակերպության կողմից արտադրված «pms-Օլանզապին» դեղը ՀՀ առողջապահության նախարարությունը 2012թ. օգոստոսին ստացել է որպես մարդասիրական օգնություն: Ի դեպ, կանադական արտադրության դեղերն աշխարհում զբաղեցնում են առաջատար դիրք, քանի որ բավականին որակյալ, արդյունավետ և անվտանգ են: «PARMA SCIЕNCE INC.» դեղագործական կազմակերպության կողմից արտադրված «pms-Օլանզապին» դեղը գրանցված է Կանադայում և լայնորեն կիրառվում է այդ երկրում։ Այն լաբորատոր փորձաքննության է ենթարկվել նաև ՀՀ ԱՆ Դեղերի և բժշկական տեխնոլոգիաների ՓԲԸ-ի կողմից՝ դրական արդյունքներով: Միայն դրանից հետո դեղը սահմանված կարգով հատկացվել է «Հոգեբուժական բժշկական կենտրոն» ՓԲԸ Ավանի հոգեբուժական կլինիկային։

Ինչ վերաբերում է նամակում բերված այն «փաստին», թե իբր այդ դեղի ազդեցությամբ հիվանդների առողջական վիճակը կտրուկ վատացել է, ապա «Հոգեբուժական բժշկական կենտրոն» ՓԲԸ Ավանի հոգեբուժական կլինիկայի արտահիվանդանոցային հոգեբուժական օգնությունն իրականացնող մասնագետների կարծիքը ճիշտ հակառակն է` «Դեղորայքի վերաբերյալ հոդվածում նկարագրվածը չի համապատասխանում իրականությանը։ Որևէ դժգոհություն հիվանդների և նրանց հարազատների կողմից չի գրանցվել, հիվանդների զննման արդյունքում բժիշկների կողմից ևս որևէ բացասական ազդեցություն չի հայտնաբերվել։ Հակառակը` այն արդյունավետ դեղորայք է»: Այս կարծիքի տակ ստորագրել է տեղամասային ինը հոգեբույժ։

Ի դեպ, դեղի պիտանելիության ժամկետը լրանում է ոչ թե դեկտեմբերին, այլ 2013թ. հունվարի 31-ին։