Իրանում հայտնել են Անդրկովկասի հարցով «3+3» հանդիպման նպատակները

Անդրկովկասի հարցով բանակցությունները, որոնք ընթանում են Թեհրանում «3+3» ձևաչափով, կարող են օգնել բարելավել իրավիճակը տարածաշրջանում, կարծում է Իրանի արտգործնախարար Հոսեյն Ամիր Աբդոլլահիանը, փոխանցում է «ՌԻԱ Նովոստին»։ Նրա խոսքով՝ հանդիպումը կարող է ճանապարհ հարթել Հարավային Կովկասում հարաբերությունների կարգավորման համար։

«Այս հանդիպման ժամանակը՝ «Հարավային Կովկասում խաղաղության, համագործակցության և զարգացման ժամանակն է», որը կարող է անկյունաքար դառնալ Հարավային Կովկասում խաղաղության հաստատման և առճակատման դադարեցման համար՝ ներտարածաշրջանային խաղացողների և հարևանների մասնակցությամբ»,- ասել է Աբդոլլահիանը։ 

Հոկտեմբերի 23-ին Թեհրանում մեկնարկել են «3+3» ձևաչափով բանակցությունները։ Հանդիպմանը մասնակցում են Ռուսաստանի, Իրանի, Թուրքիայի, Հայաստանի և Ադրբեջանի արտգործնախարարները։ Բանակցությունների ձևաչափը նախատեսում է վեցերորդ պետության՝ Վրաստանի մասնակցությունը, սակայն վերջինս որոշել է ձեռնպահ մնալ հանդիպմանը ներկայացուցիչ ուղարկելուց։