Իրանում մահացել է 16-ամյա աղջիկը, ով կոմայի մեջ էր ընկել հիջաբ չկրելու համար կալանավորվելուց հետո

Իրանում մահացել է Թեհրանի 16-ամյա բնակչուհի Արմիտա Գերավանդը, ով կոմայի մեջ է ընկել այն բանից հետո, երբ ոստիկանությունը ձերբակալել էր նրան հիջաբ չկրելու համար։

Այս մասին հայտնում է CNN-ը՝ հղում անելով իրանական պետական ​​լրատվամիջոցներին։

Ինչպես հայտնում է Tasnim գործակալությունը, բժիշկները գործադրել են բոլոր ջանքերն աղջկան փրկելու համար, սակայն ի վերջո նրա մոտ ուղեղի մահ է ախտորոշվել։

Իրանցի իրավապաշտպանների խոսքով՝ աղջկան ձերբակալել էին 2023 թվականի հոկտեմբերի 1-ին մետրոյի «Շոհադա» կայարանում՝ հիջաբ չկրելու պատճառով։

Ինչպես հայտնում է իրանա-քրդական Hengaw իրավապաշտպան կազմակերպությունը, ոստիկանները փաստացի հարձակվել են Գերավանդի վրա, նա ստացել է լուրջ վնասվածքներ և ընկել կոմայի մեջ։ Իրավապաշտպան աղբյուրի փոխանցմամբ՝ աղջկան հիվանդանոցում հսկել են Իրանի անվտանգության աշխատակիցները։ Այցելուներին, այդ թվում՝ ընտանիքի անդամներին, թույլ չեն տվել տեսնել նրան։ Բացի այդ, անվտանգության ուժերը ձերբակալել են մի լրագրողի, ով հիվանդանոց էր եկած եղել ռեպորտաժ նկարահանելու համար։