Սաակաշվիլիի որդին անցե՞լ էր ընդդիմության կողմը

Վրաստանի նախագահ Միխայիլ Սաակաշվիլիի ավագ որդի Էդվարդը գաղտնի մասնակցել է հոկտեմբերի 1-ին կայացած խորհրդարանական ընտրություններից առաջ այն ժամանակ դեռ ընդդիմություն հանդիսացող «Վրացական երազանք» կուսակցության վերջին՝ սեպտեմբերի 29-ին կայացած բազմահազարանոց ցույցին. այս մասին հայտարարել է վրացի հայտնի քաղաքական գործիչ, նախկին պատգամավոր Պետրե Մամրաձեն. փոխանցում է ВЗГЛЯД թերթի թղթակիցը Վրաստանից։

«Ալիա» թերթին տված հարցազրույցում Մամրաձեն պատմել է, որ ցույցի ժամանակ կանգնած է եղել Սաակաշվիլիի որդուց մի քանի մետր հեռավորության վրա, վերջինս եղել է սև արևային ակնոցներով և գլխակապիչով (բանդանայով)։ «Ես չմոտեցա, որովհետև նա ակնհայտորեն ցանկանում էր մնալ աննկատ։ Տղան սովորում է Ցխնետիի ամերիկյան դպրոցում (Թբիլիսիի արվարձան), և նրա համադասարանցիներն ինձ ասել են, որ նա իրենց հետ միասին ներկա է գտնվել ցույցի ժամանակ»,-պատմել է քաղաքական գործիչը։ «Փառք Աստծո, որ երեխան նման չէ հորը»,-ասել է Մամրաձեն։

«Ընտանիքում Միշային (Միխայիլ Սաակաշվիլիին) կոչ են անում ինչքան հնարավոր է արագ հրաժարական տալ»,-հայտարարել է նախկին պատգամավորը, ով ավելի վաղ գլխավորել էր Վրաստանի նախագահի գրասենյակը։

«Ես այդ ընտանիքին լավ եմ ճանաչում և տիրապետում եմ տեղեկատվության մի շարք աղբյուրներին»,-ավելացրել է Մամրաձեն։ Նրա խոսքերով՝ ավագ որդին ևս կոչ է արել հորը հրաժարական տալ։ «Սաակաշվիլին միշտ մտածում է միայն իր մասին»,-հայտարարել է Մամրաձեն։ «2008 թվականին Ռուսաստանի հետ պատերազմի ժամանակ Սաակաշվիլիի կողքին կանգնած ամերիկացիներն ինձ ասում էին, որ նրան չեն հետաքրքրում զոհված զինվորները և կորսված տարածքները։ Սաակաշվիլին մտածել է միայն այն մասին, թե ինչպես երևա CNN-ի կամ BBC-ի եթերից»,-ասել է Մամրաձեն։

Հիշեցնենք, որ ավելի վաղ վրացական ԶԼՄ-ները հայտնում էին այն մասին, որ Սաակաշվլիիի կինը՝ հոլանդացի Սանդրա Ռուլովսը, ցանկանում է լքել Վրաստանը։ Նշենք նաև, որ Սաակաշվիլին ևս մեկ՝ կրտսեր որդի ունի։