«Կոնսենսուս մինուս մեկ» գաղափարն այլևս ակտուալ չէ

Քաղաքական փորձագետ Տիգրան Աբրահամյանը facebook սոցցանցի իր էջում գրել է.

««Կոնսենսուս մինուս մեկ» (մինուս մեկը ՀՀԿ-ն է) գաղափարը, որի հիմնական դրոշակակիրներն են ՀԱԿ-ն ու ԲՀԿ-ն (կապ չունի' ով հրապարակային և ով «տակից») կարելի է ասել՝ արդեն տապալվել է: Անհնար է չնկատել, որ երկրում շատ, թե քիչ ազդեցություն ունեցող գլխավոր ուժերն այսօր Խորհրդարանում են, և չկա մի ազդեցիկ ուժ (ինչպիսին որ ՀԱԿ-ն էր մինչ 2012-ի խորհրդարանական ընտրությունները), որ հայտնվել է «դրսում»: Այդ ուժերից «Ժառանգությունը» հայտարարել է, որ նախագահական ընտրություններին հանդես է գալու սեփական թեկնածուով (Րաֆֆի Հովհաննիսյան), ՕԵԿ-ն (իր ֆինանսական և վարչական ռեսուրսներով) ու ՀՀԿ-ն պաշտպանելու են գործող նախագահին, իսկ ՀՅԴ-ն, ՀԱԿ-ն ու ԲՀԿ-ն դեռ որոշում չունեն: Արդյունքում կարելի է ֆիքսել, որ խորհրդարանական երեք ուժերը արդեն իսկ դուրս են այդ գաղափարից, իսկ գաղափարի դրոշակակիրները նույնիսկ որոշում չեն կայացրել և հայտնվել են լուսանցքից դուրս ընկելու վտանգի առաջ: Այսօր էլ արդեն կարող ենք ֆիքսել, որ «Կոնսենսուս մինուս մեկ» գաղափարն այլևս ակտուալ չէ, իսկ դրա «հայրերն» իրենց հաշվարկներում ակնհայտ սխալվել են:

Հ.Գ. Ամենայն հավանականությամբ, նախագահական ընտրություններում համագործակցություն կլինի միայն ՀԱԿ-ի և ԲՀԿ-ի միջև, սակայն դեռևս պարզ չի, թե դա ինչ ձևով կարտահայտվի, իսկ ՀՅԴ-ն, որ, ամենայն հավանականությամբ, թեկնածու չի առաջադրի, հիմնականում չեզոք դիրք կզբաղեցնի (եթե, իհարկե, երկրորդ նախագահը չառաջադրվի) »: