Ստեփան Սաֆարյան. Ավանում բոլորը կցանկանան փոխել իրենց կյանքը

«Նոյեմբերի 6–ին տեղի ունեցավ իմ քարոզարշավի մեկնարկը։ Մենք մեկնարկը սկսեցինք շտաբի ակտիվիստների մասնակցությամբ, մեր շտաբի անդամները ներկայացրին մեր առաջիկա ծրագրերը, բաժանեցինք բուկլետներ։ Այնտեղ էին նաև իմ ընկերները, ովքեր ինձ բարի երթ մաղթեցին։ Այսօր լրագրողների հետ հանդիպմանը հայտարարեց «Ժառանգություն» կուսակցության ներկայացուցիչ, Ավան համայնքն ընդգրկող թիվ 1 ընտրատարածքում ԱԺ մեծամասնական ընտրակարգով պատգամավորության թեկնածու Ստեփան Սաֆարյանը։

«Թիվ 1 ընտրատարածքում առաջադրվել եմ այն պարզ ցանկությամբ, որ անցած հինգ տարիների ընթացքում ԱԺ գործունեությունը գոնե ինձ համոզել է, որ ես կարող եմ օրենսդիր գործունեություն ծավալել և այդ հարթակը օգտագործել որոշումների վրա ազդելու և ընտրողների ցանկություններն արտահայտելու համար»,–ասաց Սաֆարյանը։

Նրա խոսքերով՝ մայիսի 6–ին «Ժառանգության» և իր՝ թիվ 1-ում ստացած քվեները ցույց տվեցին, որ իրենց աշխատանքը գնահատվել է, և գնահատվել է չափազանց մեծ ընտրազանգվածի կողմից։

«Իմ հիմնական խոսքը բնակիչներին լինելու է այն, որ իրենք կարող են ունենալ այնպիսի մի ներկայացուցիչ ԱԺ–ում, որին լսելիս իրենք կարող են վստահ լինել, որ դա իրենց ձայն է, իրենց տեսակետն է»,–ասաց պատգամավորության թեկնածուն։

Վերջինս նշեց նաև, որ նախկինում ինքը եղել է համամասնական ընտրակարգով ընտրված պատգամավոր, և սա իր համար փորձություն է, բայց և հնարավորություն առավել արդյունավետ լինելու համար։

Սաֆարյանն ընդգծեց նաև, որ պատգամավորի մանդատն իր և իր ընտանիքին ոչինչ չի տվել. «Ինձ համար դա շահերը ներկայացնելու միջոց չէ, անձնական խնդիրներ լուծելու առիթ չէ։ Ինձ համար սա ծառայություն է»։

Բանախոսը նշեց, որ իր կարգախոսն է «Միասին փոխենք մեր կյանքը», քանի որ, ըստ իրեն, Ավանում բոլորը կցանկանան փոխել իրենց կյանքը։