Ստեփան Սաֆարյան. Թիվ 1 ընտրատարածքի ընտրությունը թեստ է նախագահական ընտրություններից առաջ

Ավան համայնքն ընդգրկող թիվ 1 ընտրատարածքում պատգամավորության թեկնածու Ստեփան Սաֆարյանն այսօր լրագրողների հետ զրույցում մտահոգություն հայտնեց, որ մարդիկ չալարեն և գնան քվեարկության։

«Հայցում եմ ընտրողների ակտիվությունը։ Մենք իշխանության նման գազելներով մարդկանց չենք հանում տներից։ Ինձ համար իմ հույսը ընտրողների զորակցությունն է։ Պետք է ընտրողներն իմանան, որ մեկ մանդատով կարելի է շատ բան անել Ավանի և ողջ երկրի համար»,– ասաց Սաֆարյանը։

Բանախոսը նշեց, որ հավասար, մրցակցային քաղաքական կյանքի վերաբերյալ խոստումները, հին և բարի ավանդությունները շարունակվում են։

«Ակնհայտ է, որ կան ընտրական օրենսգրքի խախտումներ։ Դպրոցներում, մանկապարտեզներում ծնողական ժողովներ են հրավիրում։ Թիվ 170 և 133 դպրոցներում ժողովներ են արել, գալիս են քարոզիչներ, ՀՀԿ–ի թեկնածուի օգտին քարոզչություն են անում, և, որ ավելի զավեշտալի է, ծնողներին կանչում են անձնագրերով և պահանջում են անձնագրի սերիաներ։ Ես բարձրաձայնել եմ այս խնդրի մասին և հույս ունեմ, որ վերջ կտան այդ ամենին։ Մի բան ակնհայտ է, սա նախագահական ընտրություններից առաջ ընտրությունների թեստ է։ Ինձ նաև միջազգային մի քանի կառույցներից ասել են, որ ակընդետ հետևում են այս ընտրություններին։ Եվ ես կցանկանայի, որ նախագահական ընտրությունների վրա ստվեր նետող ընտրություն չլիներ և չազդեին նախագահական ընտրություններին ժողովրդի հավատի վրա»,–ասաց պատգամավորի թեկնածուն։

Անդրադառնալով այն հանգամանքին, որ Ավան համայնքը և թիվ 1 ընտրատարծքը դիտվել է որպես ԱԺ նախկին պատգամավոր Ռուբեն Հայրապետյանի տարածք, Սաֆարյանն ասաց, որ նա իր ձևով է աշխատել, ինքն իր ձևով պետք է աշխատի։

«Մեծամասնական ընտրակարգի դեպքում կարծես լինում են «զոն նայողների» ընտրություններ։ Թեկնածուն՝ ընդդիմադիր, թե անկախ, պայքարում է ոչ թե անձի դեմ, այլ մի ամբողջ համակարգի դեմ։ Ես չեմ համարում, որ իմ մրցակիցն է ՀՀԿ–ի թեկնածուն կամ քաղաքապետը, որի բարեկամն է ՀՀԿ թեկնածուն։ Իմ մրցակիցը պետությունն է։ Բայց ես ինձ վստահ եմ զգում, անմրցակից եմ զգում»,–ասաց Սաֆարյանը։