Հայ ծանրամարտիկները՝ բրոնզե մեդալակիրներ

Իսրայելի Էյլաթ քաղաքում անցկացվող ծանրամարտի համաշխարհային ուսանողական առաջնության մեկնարկը հաջող էր Հայաստանի պատվիրակների համար:

Առաջինը մրցահարթակ ելած Սմբատ Մարգարյանը / 56 կգ / երկամարտի 231 կգ / 100 կգ + 131 կգ / արդյունքով գրավեց երրորդ տեղն ու արժանացավ բրոնզե պարգևի: Հաղթող ճանաչվեց մոլդովացի Իգոր Բոուրը / 258 կգ /: Երկրորդ տեղը գրավեց թաիլանդցի Չի Չունգ Թանը / 240 կգ /:

Բրոնզե մեդալի արժանացավ նաև Վանիկ Ավետիսյանը / 69 կգ /, որը երկամարտում ցույց տվեց 315 կգ / 142 կգ +173 կգ / արդյունք: Հաղթեց կորեացի Ջեոնգսիկ Վոնը / 318 կգ /: Նույն արդյունքով արծաթե մեդալ ստացավ մոլդովացի Արտյոմ Պիպան, ով կորեացուն զիջեց անձնական բարձր քաշի պատճառով:

Մրցումները շարունակվում են: Հայաստանից ծանրահարթակ կելնեն ևս չորս մարզիկներ, տեղեկացնում է armnoc.am-ը: