Չընդունվեց ՀԱԿ-ի ներկայացրած օրենսդրական փաթեթը. Ժամկետային զինծառայողները կշարունակեն քվեարկել

Գործադիրն այսօր տեղի ունեցած հերթական նիստի ժամանակ բացասական եզրակացություն տվեց Հայաստանի Հանրապետության Ազգային Ժողովի պատգամավորներ Լևոն Զուրաբյանի, Արամ Մանուկյանի, Լյուդմիլա Սարգսյանի, Նիկոլ Փաշինյանի, Ստեփան Դեմիրճյանի և Գագիկ Ջհանգիրյանի՝ օրենսդրական նախաձեռնության կարգով ներկայացրած «Հայաստանի Հանրապետության ընտրական օրենսգրքում փոփոխություններ և լրացումներ կատարելու մասին», «Բնակչության պետական ռեգիստրի մասին» Հայաստանի Հանրապետության օրենքում փոփոխություններ և լրացումներ կատարելու մասին» և «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքների նախագծերի փաթեթին:

Նախագծերից մեկով առաջարկվում էր կալանքի տակ գտնվող և ձերբակալված անձանց, նաև ժամկետային զինվորական ծառայության մեջ գտնվող անձանց զրկել ընտրելու իրավունքից, որն ըստ ՀՀ արդարադատության նախարար Հրայր Թովմասյանի՝ ուղղակիորեն հակասում է Սահմանադրության 30 հոդվածին:

«Հաջորդը վերաբերում էր նրան, որ ընտրությունները նշանակելուց հետո թեկնածուները չեն կարող որոշակի գործողություններ կատարել, այս օրենքի կիրառումն անհնարին է, որովհետև ընտրությունների նշանակումից հետո դեռևս թեկնածուներ չկան: Թեկնածուն ընտրական պրոցեսում հստակ իրավական կարգավիճակ ունեցող անձ է, և ընտրությունները նշանակվում են քվեարկության օրվանից 60 օր առաջ, ապա թեկնածուները գրանցվում են 30-35 օր առաջ, ուստի այս նորմի կիրառումն անհնարին է, քանի որ մենք 60-65 օր առաջ չգիտենք, թե ով է թեկնածուն, որպեսզի նրանց արգելենք», ասաց Հրայր Թովմասյանը:

Մեկ այլ նախագծով էլ առաջարկվում էր անցումը 100 տոկոս համամասնական ընտրակարգին, «որի վերաբերյալ կառավարությունն իր եզրակացությունը հայտնել է. դա բացասական է, և մենք դեմ ենք այս նախագծին»,-ասաց նախարարը: