Ինչո՞ւ է ԲՀԿ-ն առաջ քաշում 100%-ոց համամասնական ընտրակարգին անցնելու գաղափարը

Քաղաքական փորձագետ Տիգրան Աբրահամյանը facebook սոցցանցի իր էջում գրել է.

«Տարօրինակ է, երբ ԲՀԿ ներկայացուցիչն անդրադառնալով 100%-ոց համամասնական ընտրակարգին անցնելու վերաբերյալ կուսակցության նախաձեռնությանը, նշում է, որ «ԲՀԿ-ն իր ծրագրում միշտ էլ ունեցել է 100%-անոց համամասնական ընտրակարգին աստիճանական անցում կատարելու կետը»: Զավեշտը ամենևին էլ ընտրակարգի փոփոխության նախաձեռնության մեջ չէ, այլ նրանում, որ նույն ԲՀԿ-ն իր ծրագրային դրույթներում ունենալով նման կետ, 2011 թվականին, ԱԺ իր գործընկերներ ՀՀԿ-ի ու ՕԵԿ-ի հետ ձեռնամուխ եղավ նոր ընտրական օրենսգրքի մշակմանը, որի ժամանակ «սկզբունքայնություն» չդրսևորվեց ու այդ ծրագրային դրույթը գոնե մասամբ չընդգրկվեց նոր օրենսգրքում: Հաշվի առնելով վերոնշյալը, հարց է առաջանում. ինչո՞ւ է ԲՀԿ-ն առաջ քաշելով 100%-ոց համամասնական ընտրակարգին անցնելու գաղափարը՝ միաժամանակ փորձում է «ցուցադրել» իր սկզբունքային լինելն այն դեպքում, երբ 2011-ին նա մի պահ «մոռացել» էր դրա մասին:

Հ.Գ. Այնուամենայնիվ, հանուն արդարության նշենք, որ ամբողջությամբ համամասնական ընտրակարգին անցնելու գաղափարը համեմատականության մեջ ավելի իրատեսական է ու փաստարկված, քան ԲՀԿ-ի մեկ այլ՝ կառավարման համակարգի փոփոխությունը:

Հ.Գ.2. Ե՛վ խորհրդարանական, և՛ նախագահական ընտրություններից առաջ ԲՀԿ-ն որպես «նոր» գաղափար հրապարակային դաշտ է նետում նախաձեռնություններ, որոնք այդքան էլ նոր չեն ու ավելի վաղ բարձրաձայնվել ու աջակցություն չէին ստացել հենց նույն ԲՀԿ-ի կողմից»: