Լիբիայում հարձակման ենթարկված դիվանագետներին հաջողվել է փրկել

ԱՄՆ-ի հետախուզության ոլորտի պաշտոնյաները հրապարակել են այս տարվա սեպտեմբերի 11-ին Լիբիայի Բենղազի քաղաքում Միացյալ Նահանգների հյուպատոսության ուղղությամբ իրականացված հարձակման մանրամասն ժամանակացույցը: Կենտրոնական հետախուզական վարչության կողմից տրամադրված տեղեկությունները հրապարակվել են՝ ի պատասխան հարձակումը կանխելու համար բավարար ջանքեր չգործադրելու մեղադրանքների:

USA Today պարբերականի հաղորդմամբ՝ հետախուզության ոլորտի բարձրաստիճան պաշտոնյաները, ովքեր չեն ցանկացել հրապարակել իրենց անունները, հայտնել են լրագրողներին, որ ԿՀՎ-ի փրկարար ջոկատն իր տեղակայման վայրից դուրս էր եկել դեպի Բենղազիում գտնվող հյուպատոսություն հարձակման մասին տեղեկություններ ստանալուց հետո 25 րոպեի ընթացքում:

Պաշտոնյաների համաձայն՝ վեց անձից բաղկացած այս խումբը չէր կարողացել 25 րոպեից շուտ դեպքի վայր հասնել, քանի որ Լիբիայի զինված ջոկատները չէին արձագանքել ԿՀՎ-ի փրկարար ջոկատի կողմից ծանր զենքով աջակցություն ցուցաբերելու խնդրանքին, ինչպես նաև հյուպատոսության շենքին մոտենալու ժամանակ ջոկատի ուղղությամբ բացված կրակի պատճառով:

Ըստ հաղորդագրության՝ ԿՀՎ-ի ջոկատը մեկ ժամ էր անցկացրել հյուպատոսության շենքում, որից հետո լքել էր այն՝ էվակուացնելով բոլոր ամերիկացիներին՝ բացի ԱՄՆ-ի սպանված դեսպանից, որն արդեն տեղափոխվել էր մոտակա հիվանդանոց:

ԿՀՎ-ն ավելի վաղ հերքել է FOX NEWS հեռուստաալիքի կողմից հրապարակված տեղեկությունները, որոնց համաձայն՝ գործակալության ծառայողները հրաման էին ստացել «չդիմել որևէ գործողության» այն ընթացքում, երբ նրանք ցանկանում էին շարժվել դեպի Բենղազիում ԱՄՆ-ի հյուպատոսություն՝ հարձակումը հետ մղելու համար: Հետախուզության ոլորտի պաշտոնյաների համաձայն՝ արձագանքը եղել էր «հնարավորինս արագ և արդյունավետ»: Պաշտոնյաները, սակայն, նշել են, որ հյուպատոսությունում գտնվող մարդկանց էվակուացման աշխատանքներն իրականացվել էին ուշացումով:

ԱՄՆ-ի հանրապետականներից շատերը պնդում են, որ նախագահ Օբամայի վարչակազմը Բենղազիի հյուպատոսությունում բավարար պաշտպանվածություն չի ապահովել՝ չնայած քաղաքում իրավիճակի վատթարացման և հարձակման բարձր հնարավորության առկայության մասին ստացված հաղորդագրությունների:

Հետախուզության ոլորտի պաշտոնյաները նշել են, թե ԱՄՆ-ի արտգործնախարարությունը համոզված էր, որ հյուպատոսության պաշտպանության համակարգում հնարավոր ցանկացած թերություն կարող էր վերացվել մոտակայքում գտնվող ԿՀՎ-ի գաղտնի հենակետի ծառայողների օգնությամբ: Նրանց կարծիքով՝ ԿՀՎ-ն և արտգործնախարարությունն ամենայն հավանականությամբ նախօրոք չէին համաձայնեցրել իրենց դերը հյուպատոսությունը պաշտպանելու գործում: