ՄԻԱՎ-ով ապրող 5-ամյա երեխան վարակը ստացել է մորից

ՀՀ-ում բնակվող ՄԻԱՎ-ով տառապող երեխան մոր հետ զբաղվում է մուրացկանությամբ: Երեխայի մայրը ոչ մի կերպ չի կարողանում նրան տեղավորել ցերեկային խնամքի որևէ կենտրոնում, որպեսզի կարողանա աշխատանք գտնել և ոչ թե փողոցում երեխայի հետ մուրալով գումար վաստակել:

Մոտ տաս օր առաջ ՄԻՊ գրասենյակի աշխատակիցները գտել են երեխային ու արդեն մի քանի օր է փորձում են լուծել նրա ցերեկային խնամքի ու սննդով ապահովելու խնդիրը, բայց ապարդյուն: Գրասենյակի երեխաների իրավունքների պաշտպան Աիդա Մուրադյանը լրագրողների հետ ունեցած զրույցում նշել է, որ դիմել են նման խնդիրներով զբաղվող շուրջ 18 կառույցների՝ պետական մարմինների և հասարակական կազմակերպությունների, սակայն ոչ մի կառույց չի ստանձնել պատասխանատվություն երեխային խնամելու համար, պատճառաբանելով, որ իրենք գերծանրաբեռնված են:

Հարկ է նշել, որ այս պահի դրությամբ երեխան ու մայրը տանն են, մուրացկանությամբ չեն զբաղվում, քանի որ որոշ հասարակական կազմակերպություններ գումար ու սնուդն են տրամադրել նրանց: Երեխայի մայրը նշել է, որ հույս չունի, որ իր երեխայի խնամքը և բուժումը կարող է հանձն առնել որևէ կառույց, քանի որ ՀՀ-ում բացակայում է նշյալ անձանց նկատմամբ մարդկային հանդուրժողականությունը:

Սեփական կամքից անկախ ՄԻԱՎ-ով վարակված երեխան փաստորեն դարձել է վտարանդի: Հաշվի առնելով, որ խտրական այս մոտեցումը, երեխային անօգնական թողնելը ոչ միայն հակամարդկային է, այլ նաև հակաիրավական, մի շարք կառույցներ, այդ թվում՝ ՀՕՖ-ը և «Օրրան» բարեգործական հիմնադրամը խոստացել են հնարավոր միջոցներով աջակցել երեխային: Ինչ վերաբերվում է Երևանի քաղաքապետարանի գործողություններին նշյալ խնդրով, մի շարք անկախ լրագրողներ նշել են, որ դեպքը բարձրաձայնելուց հետո վերջիններս խուսափում են պատասխանել անգամ հեռախոսազանգերին, նշելով, որ կպատասխանեն համապատասխան գրության դեպքում: