Թուրքական դատարանը ցմահ ազատազրկում է իսրայելցի գեներալներին

Ստամբուլում չորեքշաբթի օրը դատական գործընթաց է սկսվել 4 իսրայելցի գեներալների նկատմամբ Գազայի հատվածին մարդասիրական օգնություն ցուցաբերել փորձող նավատորմի ակտիվիստների սպանության մեղադրանքով: Դա ևս մեկ փորձություն է լարված իսրայելա-թուրքական հարաբերությունների համար. գրում է Deutsche Welle-ն:

Թուրքական դատախազությունն ինը ցմահ բանտարկություն է պահանջում յուաքանչյուր 4 իսրայելցի նախկին գեներալների համար, որոնց մեղավոր է համարում 2010թ. Գազայի հատվածին հումանիտար օգնություն ցուցաբերող թուրքական նավի վրա գտնվող Թուրքիայի 9 քաղաքացիների սպանության համար: Գեներալների նկատմամբ հեռակա կարգով դատավարություն է վարվելու:

Իսրայելն իր հերթին միջադեպն արդեն գնահատել է որպես միակողմանի իրավական գործընթաց և հրաժարվել է համագործակցել: Բացի այդ՝ իսրայելցի փորձագետները կասկածում են, որ թուրքական քրեական դատարանն իրավական առումով ընդհանրապես իրավասու է նման դեպք քննել:

Երկու տարի առաջ 37 երկրների մարդու իրավունքների պաշտպանները թուրքական «Մավի Մարմարա» նավով փորձում էին ճեղքել Իսրայելի կողմից շրջափակած Գազայի հատվածը մարդասիրական օգնություն հասցնելու նպատակով: Իսրայելական կողմի հարձակման արդյունքում մարդու իրավունքների պաշտպանների 9 ակտիվիստներ զոհվել են, ևս 30-ը՝ վիրավորվել:

Դրան ի պատասխան՝ պաշտոնական Անկարան հետ էր կանչել իր դեսպանին Իսրայելից և պահանջել Իսրայելից ներողություն խնդրել, ինչը իրսրայելական կողմը չէր բավարարել: