Ասադին և նրա ընտանիքին պատրաստ են ընդունել Մերձավոր Արևելքի մի շարք երկրներ

Սիրիայի նախագահ Բաշար Ասադին և նրա ընտանիքին պատրաստ են ընդունել որոշ երկրներ, հատկապես՝ Մերձավոր Արևելքում, եթե նա համաձայնվի լքել Սիրիայի արաբական հանրապետությունը: Այդ մասին հայտնել է ԱՄՆ-ի Պետքարտուղարության մամլո ծառայության պետ Վիկտորիա Նուլանդը. հաղորդում է Ալ Արաբիան:

Նուլանդն այդպես մեկնաբանել է Մեծ Բրիտանիայի վարչապետ Դևիդ Քեմերոնի խոսքերը, որը ավելի վաղ Աբու Դաբիում հայտարարել էր Լոնդոնի պատրաստակամությունն ապահովել Ասադի անվտանգ տեղափոխությունը Սիրիայից, եթե սիրիական բանակը դադարեցնի մարտական գործողություններն ապստամբների նկատմամբ:

Նուլանդը նշել է նաև, որ Քեմերոնն արդյունքում հստակորեն հասկանալ է տվել, որ Մեծ Բրիտանիան, բացի այդ, ցանկանում է նաև Ասադին պատասխանատվության ենթարկել:

Նուլանդը չի նշել պետությունների անուները, որոնք պատրաստակամություն են հայտնել ապաստան տալ Ասադին: «Թող նրանցից յուրաքանչյուրն իր անունից խոսի»,-հայտարարել է Նուլանդը:

Սակայն Ասադը նշել էր, որ ոչ մի պաչրագայում չի պատրաստվում լքել երկիրը։ «Նման միջամտությունների գինը, եթե դա տեղի ունենա, ուժերից վեր կլինի ամբողջ աշխարհի համար: Եթե Սիրիայում խնդիրներ առաջանան, դա շղթայական ռեակցիա կառաջացնի, որը կանդրադառնա Ատլանտիկից մինչև Խաղաղ օվկիանոսի բոլոր երկրների վրա։ Այդ պատճառով ես չեմ կարծում, որ Արևմուտքը կգնա այդ ճանապարհով։ Սակայն, եթե այս ամենը տեղի ունենա, ոչ ոք չի կարող կանխատեսել, թե ինչ կլինի հետագայում»,-մասնավորապես նշել է նա։