Տարածվե՞լ է աֆրիկյան ժանտախտ, թե՞ ոչ

Այսօր «Ժողովուրդ» օրաթերթը գրել էր, որ թերթը ահազանգ էր ստացել ՀՀ Տավուշի մարզի Կոթի համայնքի բնակիչներից: Բնակիչները թերթին պատմել էին, որ իրենց մոտ այս մեկուկես ամսվա ընթացքում 100-ից ավելի խոզ է սատկել, և նրանց խոսքով՝ խոզերի մոտ աֆրիկյան ժանտախտ է տարածված։

Lurer.com-ը կապ հաստատեց Սննդի անվտանգության պետական ծառայության պետի մամլո պատասխանատու Բաբկեն Պիպոյանի հետ՝ պարզելու՝ ինչ է իրականում կատարվում, և արդյոք համապատասխան ստուգումներ իրականցվում են։

«Այդ տեղեկություններն իրականությանը չեն համապատասխանում, այն էլ հիմա, երբ հատկապես Տավուշի մարզը գտնվում է հսկողության տակ։ Մենք, արձագանքելով այդ հրապարակմանը, տեսուչ ենք ուղարկել, պարզվել է՝ վերջին մի քանի ամսվա ընթացքում երեք խոճկոր է սատկել, այն էլ՝ թունավորման հետևանքով»։

Բաբկեն Պիպոյանն անդրադարձավ նաև այն տեղեկությանը, թե Տավուշի մարզում աֆրիկյան ժանտախտ է տարածված վերջինս մասնավորապես նշեց. «Ինչ վերաբերում է Աֆրիկյան ժանտախտին, դա այնպիսի հիվանդություն է, որը շատ արագ է տարածվում, ու դրա դեմ բոլոր աշխատանքները սկսվում են առաջին վայրկյանից։ Այդ հիվանդությունը գերարագ է տարածվում, տնտեսական մեծ վնասներ է հասցնում, եթե հարյուր կենդանի վարակվի, մի քանի շաբաթվա ընթացքում այն կդառնա տասը հազարի»։