Եթե ընտրություններն անցնեն որակապես ավելի բարձր մակարդակով, ապա իշխանությունը կպարտվի

Լուրեր.com-ի հետ զրույցում տարածաշրջանային հետազոտությունների և խորհրդատվական խմբի անդամ Սուրեն Մովսեսյանը, գնահատելով այսօր Հայաստանում տիրող ներքաղաքական իրավիճակը, ասաց, որ Հայաստանում կա միայն մեկ ուժ՝ ՀՀԿ-ն՝ Սերժ Սարգսյանի գլխավորությամբ։

Նրա խոսքերով՝ պետք չէ միամիտ լինել և ընկալել ՀՀԿ–ԲՀԿ հարաբերություններում, այսպես կոչված, «տարաձայնությունները» կամ «պրոբլեմները»՝ այնպես, ինչպես ներկայացվում է:

«Սա ուղղակի խաղ է, խաղ՝ իր կանոններով, որտեղ ամեն կողմ իր դերն է խաղում: Նրանք խաղում են այդ բեմականացումը նախապես պայմանավորված կանոններով: Այդ խաղի նպատակն է ցույց տալ, որ գոյություն ունի ընդդիմություն, որը տարաձայնություններ ունի իշխող կուսակցության հետ»,-ասաց նա:

Վերջինս նշեց նաև, որ եթե հետ գնանք 2008, այն ժամանակ նույնպես պետք էր ընդդիմություն, և ըստ Մովսեսյանի՝ այդ դերակատարությունը ստանձնեց Լևոն Տեր-Պետրոսյանը:

«Հիշե՛ք՝ նա հասարակության կրիտիկական մասը հասցնում էր եփման կետին և հետ նահանջում: Ոչ մի անգամ նա վճռական քայլերի չգնաց: Հասարակության այդ կրիտիկական մասը հիասթափվեց, և մենք ունեցանք այն, ինչ ունենք այսօր: Նախագահական ընտրությունների շեմին նույնպես անհրաժեշտ է նման կերպար: Փորձ արվեց Վարդան Օսկանյանին հանձնել այդ դերակատարությունը, բայց չստացվեց: Նա լիդերի ունակություններով օժտված չէ: Սպասենք տեսնենք՝ ով է ստանձնելու այդ դերակատարությունը՝ թատրոնը շարունակելու համար: Համոզված եմ՝ մենք ամպագորգոռ հայտարարությունների, բացահայտումների, անհիմն քննադատությունների և մեկը մյուսին հակասող գործողությունների ականատես կդառնանք: Սակայն մեր հասարակությունը պետք է վերջապես հասկանա, որ այս ամբողջը միայն խաղ է, խաղ՝ ուղղված պահպանելու իշխանության ներկա շրջանակը, որովհետև բոլոր նրանք, ում տեսնում ենք, այդ շրջանակի մեջ են»,– ասաց նա:

Լրագրողի այն հարցին, թե միջազգային հանրությունը, մասնավորապես ԱՄՆ-ը և Ռուսաստանը ինչ ազդեցություն կունենան Հայաստանում կայանալիք առաջիկա նախագահական ընտրությունների վրա, Մովսեսյանն ասաց.

«Միջազգային հանրությունն ակնկալում է որակապես ավելի բարձր ընտրություններ: Ռուսաստանն ակնկալում է պահպանել այն, ինչ այսօր կա Հայաստանում: Ուստի Հայաստանը ընտրության առջև է կանգնած: Եթե ընտրություններն անցնեն որակապես ավելի բարձր մակարդակով, ապա իշխանությունը կպարտվի, իսկ Ռուսաստանը կկորցնի իր համար ցանկալի դաշնակից՝ Հայաստանին, ինչը կկանգնեցնի մեր երկրի անկանխատեսելի դրության առջև: Եթե ընտրություններն անցնեն այնպես, ինչպես միշտ, ապա Ռուսաստանը կպահպանի իր ցանկալի գործընկեր Հայաստանը, սակայն միջազգային հանրությունը, ԱՄՆ-ն և ԵՄ-ն հարցականի տակ կդնեն բազմաթիվ ծրագրեր՝ արևելյան գործընկերություն, ԵՄ ազատ առևտրի վերաբերյալ բանակցությունները, տարբեր տեսակի ֆինանսական աջակցություններ: Բացի դրանից՝ խիստ գնահատական կտրվի, և մեր երկիրը միջազգային ասպարեզում լուրջ խնդիրներ կունենա: Սակայն լավագույն տարբերակը՝ գոյացնել երկու կողմերին, այն է՝ բեմականացումը, երբ ոչխարները ողջ են, իսկ գայլերը՝ կուշտ»,–ասաց նա: