Թուրքիայում կառավարման նախագահական համակարգին անցումը կընթանա ներքաղաքական պայքարի սրմամբ

Թուրքիայի քաղաքական ուժերը ոչ միանշանակ են վերաբերվում կառավարման խորհրդարանական համակարգից նախագահականին անցնելու օրինագիծին, ու դա կարող է հանգեցնել քաղաքական պայքարի։ Թուրքական Kafkassam վերլուծական կենտրոնի փորձագետների կարծիքով՝ օրինագիծը մշակվել է վարչապետ Էրդողանի նախաձեռնությամբ, ով նպատակ ունի դառնալ երկրի նախագահ։ «Նրա ղեկավարած «Արդարություն ու զարգացում» կուսակցությունն իսլամական ուղղվածություն ունի, ուստի դա քեմալական ուղղվածության ուժերի հավանությանը չի արժանանա, արդյունքում երկրում կսկսվի ներքաղաքական պայքար»։

Ըստ վերլուծաբանների՝ խորհրդարանի կողմից օրինագծի ընդունման դեպքում Թուրքիայի արտաքին քաղաքականությունն ավելի «արկածախնդիր» ու վտանգավոր կլինի հարևան երկրների համար: «Էրդողանն անհավասարակշիռ քաղաքական գործիչ է, իսկ այդ հանգամանքը հակասում է Թուրքիայի քաղաքականությանը։ Էրդողանի դեպքում Թուրքիայի արտաքին քաղաքականությունն անկանխատեսելի է»։

Ինչպես ավելի վաղ հայտնել էին թուրքական լրատվամիջոցները, Թուրքայում իշխող «Արդարություն ու զարգացում» կուսակցությունը խորհրդարանին էր ներկայացրել կառավարման նախագահական համակարգին անցնելու մասին օրինագիծը։

Հարկ է նշել, որ Թուրքիայում գործող քաղաքական համակարգի պայմաններում երկրում իրական իշխանությունը պատկանում է վարչապետին։ Ի տարբերություն նախկին ընտրությունների, երբ նախագահն ընտրվում էր խորհրդարանի կողմից՝ սահմանադրական փոփոխություններից հետո Թուրքիայի նոր նախագահը 2014-ին ընտրվելու է ուղղակի ընտրությունների միջոցով։

Թուրքական լրատվամիջոցները բազմիցս տեղեկացրել են, որ Էրդողանը ցանկանում է փոխել երկրի կառավարման համակարգն ու դառնալ նախագահ։ Կառավարող կուսակցության կանոնադրությամբ՝ նա այլևս չի կարող պատգամավորի թեկնածու առաջադրվել, ուստի հանդես է եկել նման օրինագծի ընդունման նախաձեռնությամբ, որ ընտրվի ուղղակի քվեարկության արդյունքում։