Նոր կուսակցություն՝ «Առաքելություն»

Հայկական իրականության մեջ սկիզբ է դրվել մի նոր կուսակցության, որը կոչվում է «Առաքելություն»։ Այս մասին լրագրողների հետ հանդիպմանն ասաց նախաձեռնող խմբի անդամ Սուքիաս Մանուկյանը, ով եղել է նաև ՀԱԿ-ի «Այլընտրանք» շարժման համախոհ:

«Նոր կուսակցությանը սկիզբ է դրվում, քանի որ երկրում ստեղծվել է անհույս քաղաքական իրավիճակ, սահմանադրական և տարրական իրավունքների ոտնահարման և անպատժելիության մթնոլորտ։ Երկրի պատմության ողջ ընթացքում երբևէ չի եղել նման իրավիճակ, երբ ամբողջ հասարակությունը չգիտի՝ ում է սատարելու, և ով է լինելու առաջնորդը: Ամբողջ ազգը նստած սպասում է՝ էս մեկը ինչ է ասելու, ով ում հետ կմիանա»,-նկատում է Սուքիաս Մանուկյանը: 

Ըստ բանախոսի՝ կուսակցությունը չի ունենալու արևմտամետ կամ ռուսամետ կողմնորոշվածություն և գործելու է՝ հիմնվելով ազատության և ժողովրդավարության արժեքների վրա:

Կուսակցությունը չի ունենա միանձնյա ղեկավար: Ղեկավար մարմինը կլինի խորհուրդը, որի անդամներն էլ կընտրվեն առաջիկայում կազմակերպվելիք համագումարի ժամանակ։ Իսկ ինչ վերաբերում է առաջիկա նախագահական ընտրություններին, «Առաքելության» անդամները նշեցին, որ կհայտնեն իրենց դիրքորոշումը, երբ հայտնի լինեն բոլոր թեկնածուները:

Ըստ կուսակցության նախաձեռնող խմբի մեկ այլ անդամ Ազատ Թովմասյանի՝ այս պահին «Առաքելություն» կուսակցությանը հարում է շուրջ 700 գաղափարակիր։