Բոլոր թեկնածուներով կանենք այնպես, որ ազատ, արդար ընտրություններ անցկացվեն. Արմենակ Դովլաթյան

Դեկտեմերի 2-ին Ավան համայնքն ընդգրկող թիվ 1 ընտրատարածքում կայանալիք ԱԺ մեծամասնական ընտրակարգով պատգամավորի թեկնածուների նախընտրական քարոզարշավը մեկնարկեց նոյեմբերի 2-ին։

Լուրեր.com–ը զրուցեց թիվ մեկ ընտրատարածքից պատգամավորի թեկնածու «Սոցիալ-էկոլոգիական դաշինքի» ղեկավար Արմենակ Դովլաթյանի հետ, ով նշեց, որ նոյեմբերի 6-ին արդեն քարոզարշավը մեկնարկել են, և ինքն արդեն մի քանի փոքր հանդիպումներ է ունեցել Ավանի բնակիչների հետ։

«Բավականին դրական արձագանքներ եմ ստացել, հանդիպումները շարունակում ենք»,–ասաց Դովլաթյանը։

Անդրադառնալով այն հարցին, թե իշխող կուսակցության թեկնածուի կողմից վարչական ռեսուրսների չարաշահում նկատել է, թե՝ ոչ, թեկնածուն ասաց. «Դեռ չեմ նկատել, բայց ուշադիր կլինեմ, եթե լինեն, անպայման դրա մասին կհայտնեմ»։

Իսկ լրագրողի այն հարցին, թե թեկնածուներից ում է իրեն մրցակից համարում Դովլաթյանը, և ինչքան է գնահատում իր հաղթելու հնարավորությունը, թեկնածուն ասաց.

«Հաշվի առնելով իշխանության թեկնածուի օրինական և անօրինական ռեսուրսները՝ բնականաբար, հիմնական մրցակից թեկնածուն ինքն է, բայց մյուս թեկնածուներով կանենք այնպես, որ ազատ, արդար ընտրություններ անցկացվեն։ Իսկ ցանկացած մարդ էլ, որ մտնում է ինչ–որ պայքարի մեջ, եթե որոշակի հաշվարկներ չունի, չի մտնում։ Ես հաղթանակի հնարավորություն ունեմ»,–ասաց Դովլաթյանը։

Հիշեցնենք, որ Ավանի թիվ 1 ընտրատարածքում մեծամասնական ընտրակարգով ընտրված ՀՀԿ–ական Ռուբեն Հայրապետյանը հրաժարվել էր իր պատգամավորական մանդատից, և դեկտեմբերի 2-ին նշանակվեցին նոր ընտրություններ։ Ընտրությունների քարոզարշավի մեկնարկը տրվեց նոյեմբերի 2-ին. այն կտևի մինչև նույեմբերի 30-ը։

Առաջադրվել է 4 թեկնածու՝ ՀՀԿ-ից՝ Ռոբերտ Սարգսյանը, «Ժառանգություն»-ից՝ Ստյոպա Սաֆարյանը, «Սոցիալ-էկոլոգիական դաշինքի» ղեկավար Արմենակ Դովլաթյանն ու «Ժողովրդական» կուսակցությունից ինքնաառաջադրված Էդուարդ Պետրոսյանը։