Համագործակցության պայմանագիր՝ ՀՀ և Բուլղարիայի Հաշվիչ պալատների միջև

Հայաստանի Հանրապետության Վերահսկիչ պալատի և Բուլղարիայի Հանրապետության Հաշվիչ պալատի միջև այսօր` նոյեմբերի 8-ին, Երևանում ստորագրվել է համագործակցության պայմանագիր` նպատակ ունենալով երկու երկրների միջև զարգացնել գործընկերությունը: Համագործակցության գլխավոր նպատակներից է փորձի փոխանակումը, կադրերի ուսուցումը, վերապատրաստման և համատեղ ու զուգահեռ վերահսկողության ապահովումը:

«Հայաստանը Բուլղարիայի հետ գերազանց հարաբերություններ ունի: Այն մեր լավագույն բարեկամ երկրներից է: Բուլղարիայի հետ Հայաստանի Վերահսկիչ պալատի հարաբերությունները նոր չեն ձևավորվում, նրանք արդեն ունեն բավականին երկար պատմություն»,-ասել է ՀՀ Վերահսկիչ պալատի նախագահ Իշխան Զաքարյանը:

ՀՀ ՎՊ նախագահի խոսքով Վալերի Դիմիտրովի հետ հանդիպման ժամանակ քննարկվել են երկու երկրների Բարձրագույն վերահսկիչ կառույցների օրենքները և դրանցից ելնելով` համագործակցության ձևաչափը: «Մենք գնումներ ենք կատարում տարբեր երկրներից, այդ թվում` Բուլղարիայից: Վերահսկողության ընթացքում հանդիպել ենք դեպքերի, երբ գնորդները թաքցրել են ապրանքների գները և որակը: Այս առումով մեր համագործակցության համաձայնագրով կարող ենք անդրադառնալ նաև այս խնդրին»,- ասել է Իշխան Զաքարյանը:

«Ինձ համար մեծ պատիվ է գտնվել Հայաստանում: Իմ այցելությունը նախատեսված էր դեռ անցած տարի, սակայն կարևոր իրադարձություններ տեղի ունեցան Բուլղարիայի Հաշվիչ պալատում: Նոր օրենք մտավ գործողության մեջ, որով առաջարկվում է նոր կառուցվածք, նոր ղեկավարում և նոր օրենքի հիման վրա ընտրվել է նոր ղեկավար անձնակազմ: Հայաստանի Վերահսկիչ պալատի մասին օրենքը ևս մի քանի տարվա վաղեմություն ունի, այնպես որ նոր օրենքների հիման վրա մենք կարող ենք բավականին հաջող համագործակցել»,-ասել է Բուլղարիայի Հանրապետության Հաշվիչ պալատի նախագահ Վալերի Դիմիտրովը:

Բուլղարիայի Հաշվիչ պալատը ստեղծվել է դեռևս 1880 թվականին և անցել է զարգացման յոթ հիմնական շրջափուլ: Հաշվիչ պալատը Բարձրագույն վերահսկիչ մարմինների միջազգային և եվրոպական կազմակերպությունների անդամ է: Եվրոպական Միության կազմում ընդգրկվելուց հետո բուլղարական կառույցն առավել հաջող է իրականացնում ներկա փուլի բարեփոխումները: